MrBeast есімімен танымал американдық блогер әрі кәсіпкер Джимми Дональдсон оңтүстік африкалық жазушы әрі контент жасаушы Тея Бойсенге үйленгенін жариялады. Тойдың суреттерін ол Instagram-дағы парақшасына салды, деп хабарлайды infohub.kz.
Жарияланған суреттерде жас жұбайлар табиғат аясында үйлену киімдерімен түскен. Пост бірнеше сағат ішінде миллиондаған лайк пен мыңдаған құттықтау жинады.
11 шілде күні MrBeast жаңа роликті шығара алмайтынын X әлеуметтік желісінде жазған еді. «Бүгін жаңа видео жоқ — мүмкін, мен үйленіп жатырмын ғой, сондықтан сәл бос емеспін», — деп жазды ол.
MrBeast пен Тея Бойсен 2022 жылы Оңтүстік Африкада танысып, бірнеше айдан кейін кездесіп жүргендерін растаған. Жұп 2025 жылдың басында некелесу туралы хабарлады. Блогер бұған дейін тойды отбасы мен жақын достарының арасында өткізгісі келетінін айтқан.
MrBeast YouTube-тағы ең танымал автор болып қала береді. Оның арнасында жүздеген миллион жазылушы бар, ал видеолары тұрақты түрде ондаған, тіпті жүздеген миллион қаралым жинайды. Ол ауқымды челлендждері, қайырымдылық жобалары және ірі ақшалай ұтыс ойындарымен танымал.