Мысыр бұған дейін Орталық Азия мемлекеттері үшін енгізген қосымша виза талаптарын қазақстандық туристерге алып тастайды. Бұл туралы infohub.kz сайты Қазақстан Республикасы Сыртқы істер министрлігіне сілтеме жасап хабарлайды.
Сыртқы саяси ведомствоның баспасөз қызметі түсіндіргендей, Қазақстанның сыртқы істер министрі Мұхтар Тілеуберді Мысырға барып, сыртқы істер, халықаралық ынтымақтастық және шетелдегі мысырлықтар мәселелері жөніндегі министр Бадр Абдельаттимен кеңейтілген құрамда келіссөз жүргізді. Кездесу қорытындысы бойынша тараптар 2006 жылғы 7 қарашадағы дипломатиялық паспорт иелерін визадан босату туралы үкіметаралық келісімге өзгерістер енгізу жөніндегі хаттамаға қол қойды. Құжат жарамды қызметтік паспорт иелері болып табылатын Қазақстан және Мысыр азаматтарына визасыз режимді таратуды көздейді.
«Келіссөздің басты қорытындыларының бірі — Қазақстанды туристік мақсатпен елге кіру кезінде мысыр тарапы қосымша талаптар қойған Орталық Азия мемлекеттерінің тізімінен шығару туралы уағдаластыққа қол жеткізілді. Бұл шешім қазақстандық туристердің Мысырға кіру шарттарын жеңілдетуге және туристік алмасуды одан әрі дамытуға бағытталған», — деп атап өтті Сыртқы істер министрлігінде.
Қазір қандай талаптар қолданыста? Қазақстан Сыртқы істер министрлігінің сайтында көрсетілгендей, 2025 жылғы 1 қазанда Мысырдың Қазақстан Республикасы азаматтарына қатысты визалық режимінің жаңа талаптары күшіне енді. 21 жасқа толмаған Қазақстан азаматтары Мысыр аумағына ата-анасының бірі — әкесі немесе шешесі сүйемелдеусіз кіре алмайды. 21 жасқа толған Қазақстан азаматтары Шарм-әш-Шейх аймағымен шектелген, ұзақтығы 15 күннен аспайтын туристік сапар кезінде Шарм-әш-Шейх халықаралық әуежайына келгенде виза рәсімдей алады. Каирге, Хургадаға немесе Мысырдың басқа қалаларына сапар жоспарлаған азаматтар Қазақстандағы Мысыр Араб Республикасының Елшілігінде алдын ала виза алуға міндетті.