Мысырлық тележүргізуші Сара Халифа мен тағы 11 адам есірткіге қатысты айыптар бойынша өлім жазасына кесілді. Бұл туралы мемлекеттік «Аль-Ахрам» газеті хабарлады.
Сот үкіміне сәйкес, олар есірткі жасауға арналған шикізатты сату мақсатында импорттаған қылмыстық топтың мүшелері болған. Сондай-ақ, олардың қолында заңсыз қару-жарақ пен оқ-дәрілер болған.
39 жастағы Халифа «Мүмкін емес миссия» атты қылмыс тақырыбындағы телебағдарламасымен танымал. Ол өзіне тағылған айыптарды жоққа шығарды.
Үкімге шағымдануға болады. Алғашқы үкім өткен айда жарияланған еді. Алайда, ол бір айдан кейін ғана расталды, себебі сот өлім жазасына қатысты заң талабына сәйкес Мысырдың бас мүфтиінен діни кеңес алды.
Сот процесі барысында билік 750 келіден астам есірткі және оларды жасауға арналған шикізатты тәркілегені айтылды. Прокуратураға 20 куәгер мәлімдеме берген, сондай-ақ, әңгімелер мен бейнежазбаларды қамтитын электронды дәлелдемелер де ұсынылған.
Мемлекеттік «Ахбар аль-Йом» газетінің мәліметінше, өткен жылғы қыркүйектегі сот отырысында судья оның іске қатысы туралы сұрағанда, Халифа есірткіге қарсы органның кеңсесінде онымен бірге суретке түскенге дейін ешқашан есірткі көрмегенін айтқан.
Amnesty International ұйымының 2025 жылғы есебіне сәйкес, жыл ішінде 492 өлім жазасы үкімі шығарылған, оның 23-і орындалған. Есепте айтылғандай, сотталушылар есірткі саудасы және зорлау бойынша кінәлі деп танылған, бұл халықаралық құқық пен стандарттарға сәйкес өлім жазасын қолдануға болмайтын «қасақана кісі өлтіруге» жатпайды.