Bloomberg агенттігі НАТО-ның жоғары әскери қолбасшылығы Ресей альянстың шығыс қанатына шабуыл жасаған жағдайда жылдам жеңіске жетудің стратегиясын әзірлеп жатқанын хабарлады. Жоспарда дрондар мен жасанды интеллектіні біріктіруге ерекше көңіл бөлінген, деп жазады infohub.kz сайты.
Басылымның мәліметінше, «Жеңіс теориясы» деп аталған құжат НАТО аумағына ықтимал басып кіру кезінде альянстың қандай әрекеттер жасайтынын айқындауға тиіс. Оны Польшада НАТО-ның Еуропадағы Біріккен қарулы күштерінің Жоғарғы бас қолбасшысы генерал Алексус Гринкевич таныстырмақ.
Ахуалдан хабардар жоғары лауазымды шенеуніктер мен дипломаттардың айтуынша, бұл құжат альянстың НАТО аумағына ықтимал басып кіруге қалай жауап беретінін нақтылауы керек. «Соңғы уақытта Мәскеудің осындай әрекеттерді қарастырып жатқаны туралы көптеген хабарламалар шықты. НАТО Бас хатшысы Марк Рютте жақында Ресейдің альянсқа конвенциялық шабуылға дайындалып жатқаны туралы ешқандай белгі жоқ екенін, алайда Еуропа ұзаққа созылатын гибридтік шабуылдарға дайын болуы керектігін мәлімдеді», — деп жазады басылым.
Қолбасшылық өкілі полковник Мартин О’Доннелл жоспардың егжей-тегжейін талқылаудан бас тартты, бірақ альянстың «тек қорғаныс сипатында» екенін атап өтті. «НАТО-ның Еуропадағы Біріккен қарулы күштерінің Жоғарғы бас қолбасшысының жеңіс тұжырымдамасы қарапайым: НАТО-ның басымдылығын сақтау. Жаһандық қауіпсіздік саласындағы тұрақсыз әрі күрделі ахуалды ескерсек, біз агрессияны тежеуге жағдай жасап, шабуыл болған жағдайда жеңіске жетуіміз керек», — деді О’Доннелл.
Құжат сондай-ақ одақтастарға НАТО-ның дәстүрлі қару түрлерін Ресейдің 2022 жылы Украинаға толыққанды басып кіруінен кейін пайда болған жаңа мүмкіндіктермен қалай ұштастыратынын көрсетуге, сондай-ақ оларды қорғанысқа инвестицияны ұлғайтуға және дайындық деңгейін арттыруға ынталандыруға тиіс, деді жабық ақпарат болғандықтан атын жасырған дереккөздер.
«НАТО-ға шабуыл жасалған жағдайда альянс құрлық әскерлері мен басқа да күштер мен құралдарды ұштастыра отырып, арзан дрондарға, экипажы аз жүйелерге және жасанды интеллект қолданылатын нысананы бағыттау технологияларына сүйенетін тұжырымдама аясында басып кіруді тоқтатуды көздейді. Маневр бостандығын қамтамасыз ете отырып, альянс қарсыластың басқару жүйесін жоюға ұмтылып, ресейлік әскерлерге жылдам әрі күйрете соққы бермек», — делінген материалда.