Өскемендегі өнеркәсіптік арматура зауытының директоры Ержан Әшімов өткен жылы 19,3 млн теңге сыйақы алғанын infohub.kz сайты хабарлайды.
Бұл сома оның алдыңғы жылғы табысынан (19,8 млн теңге) сәл аз. Топ-менеджердің орташа айлық төлемі 1,6 млн теңгені құраған, бұл өткен жылдардағы деңгейге сәйкес келеді.
Айта кетерлігі, кәсіпорынның өзі 2025 жылды 522 млн теңге шығынмен аяқтаса, бір жыл бұрын 1,9 млрд теңге пайда тапқан еді.
Мұнай және газ құбырларына арналған құбыр арматурасын, сондай-ақ мұнай және газ кен орындарына арналған жабдықтарды шығаратын зауыт Дәриға Назарбаеваның туысы Сергей Чайжунусовтың жұбайы Гүлнара Чайжунусоваға тиесілі.
Компания акцияларының 80 пайызы Гүлнара Чайжунусова бақылайтын «Мицар 2013» компаниясында. Қалған үлестер Валентина Сим мен Динара Әшімова арасында бөлінген — әрқайсысында 10 пайыздан.
Сергей Чайжунусов сонымен қатар түсті металлургия кәсіпорындарын жобалау бойынша жетекші компания «Қазгипроцветметтің» құрылтайшысы және бірқатар тау-кен өндіру, сауда және ауыл шаруашылығы кәсіпорындарының иесі.
Айта кету керек, 2018 жылы Дәриға Назарбаеваның қызы Венера Сергей Чайжунусовтың інісі Дален Чайжунусовқа тұрмысқа шыққан.