NEF Qazaqstan құрылыс компаниясының бұрынғы басқарушы серіктесі Тарык Волкан Оскай ерекше ірі мөлшердегі алаяқтық жасағаны үшін кінәлі деп танылды. Алайда ол амнистияның арқасында бостандықта қалды — қазір Астанада пробациялық бақылауда жүр, деп хабарлайды infohub.kz сайты.
Қазақстан Республикасы Ішкі істер министрлігінің баспасөз қызметі ресми сауалға жауап ретінде түсіндіргендей, Тарык Волкан Оскайға қатысты сотқа дейінгі тергеуді Алматы полиция департаменті Қылмыстық кодекстің «Ерекше ірі мөлшерде жасалған алаяқтық» бабы бойынша жүргізген.
Ол ақпан айында Черногориядан Қазақстанға экстрадицияланып, ІІМ Қылмыстық-атқару жүйесі комитетінің мекемесіне қамалған. Мамыр айында Алматының Алмалы ауданы сотының үкімімен ол аталған бап бойынша кінәлі деп танылды.
«ҚР Конституциясының отыз жылдығына байланысты амнистия туралы» заңға сәйкес оған ҚК 63-бабының 3-бөлігін қолдану арқылы пробациялық бақылау белгіленіп, төрт жылға бас бостандығынан айыру жазасы шартты түрде тағайындалды», — деп мәлімдеді ІІМ.
Қазіргі таңда ол Астанада пробациялық бақылауда.
Естеріңізге сала кетейік, 2025 жылдың сәуірінде ІІМ NEF Qazaqstan басқарушы серіктесі Тарык Волкан Оскайды іздестіруге жариялаған болатын. Сөз түрік Nef холдингіне кіретін NEF Qazaqstan құрылыс компаниясы туралы болған.
2023 жылдың күзінде NEF Qazaqstan AIX алаңында 4 млрд теңгеге облигация және 402 млн теңгеге купондық борыш бойынша алғашқы дефолтқа жол берді. Компания бұл қаражатқа Алматыда Green Center тұрғын үй кешенін салып жатқанын айтқан, ал борыш бойынша төлемдердің жоқтығын «жылжымайтын мүлік сатып алушылардың дебиторлық берешегіне байланысты ақшалай үзіліспен» түсіндірген.
Өткен аптада Qumash желілік басылымы Тарык Волкан Оскайдың Астанада пробациялық бақылауда жүргені туралы ақпарат жариялады. Басылым оқырмандары оны Астанада серуендеп жүргенін байқағаны атап өтілген.