Қазақстанда нефрологиялық көмектің жаңа стандарты бекітілді: бүйрек ауруы бар науқастар үшін емханадан қажетті ем алуға дейінгі бірыңғай маршрут құрылады. Бұл туралы Ақтауда өткен Орталық Азия нефрологтары конгресінде мәлім болды, деп хабарлайды infohub.kz сайты.
Жаңа тәсілдің негізгі міндеттері — бүйрек ауруларын ерте сатыда анықтау, сондай-ақ диализ бен трансплантацияның қолжетімділігін арттыру.
Ақтауда Қазақстан, АҚШ, Италия, Польша, Түркия, Әзірбайжан және Беларусь елдерінен бірнеше жүз дәрігер жиналды. Сарапшылар бүйрек ауруларын диагностикалау мен емдеудің заманауи әдістерін талқылады.
«Біз көмек стандарттарын жетілдіріп, арнайы орталықтарды дамытып, медициналық кадрлар даярлаймыз. Бүгінде резидентурада 50-ден астам болашақ нефролог білім алуда, тағы 12 маманды 2026–2027 оқу жылында даярлау жоспарланған», — деді өз сөзінде Медициналық көмекті ұйымдастыру департаментінің стационарлық және стационарды алмастыратын медициналық көмек басқармасының жетекшісі Майра Абдразак.
Қолда бар деректерге сәйкес, елімізде бүгінде Республикалық нефрология орталығы және Трансплантацияны үйлестіру мен жоғары технологиялық медициналық қызметтердің республикалық орталығы жұмыс істейді. 14 мыңнан астам қазақстандық диализдік терапия алуда.
Диализ бен трансплантация міндеттері нақты қалай шешілетіні хабарланбады. Алайда цифрландыру дәрігерлерге қосымша мүмкіндіктер жасауы тиіс екені атап өтілді. Қазір қалыптасып жатқан E-Densaulyq жүйесі медицина қызметкерлеріне науқастың медициналық тарихына ол емделген аймаққа және ұйымға қарамастан қол жеткізуге мүмкіндік береді.
Конгресс қорытындысы бойынша медиктер нефрологиялық қызметті дамытудың салалық бағдарламасын әзірлеуді де ұсынды. Онда ерте диагностикаға, мамандар даярлауға және емнің қолжетімділігін арттыруға баса назар аударылады.
Бұған дейін «Курсив» Шымкент хирургтары ұзақ жылдар диализ алған науқасқа бүйрек трансплантациялағанын жазған болатын.