Непалдағы апат одан әрі ушығып келеді: үкіметтің соңғы деректері бойынша, жойқын су тасқыны салдарынан қаза тапқандар саны 734 адамға жетті, деп хабарлайды infohub.kz сайты.
Жаңартылған мәліметке сәйкес, хабар-ошарсыз кеткендер саны 2 498 адамды құрайды, оның 589-ы — шетел азаматтары. Барлық зардап шеккен аймақтарда құтқару жұмыстары жалғасуда. Іздеу-құтқару және гуманитарлық операцияларға 19 895 қауіпсіздік қызметкері тартылған, оның ішінде Непал армиясының 8 399 әскери қызметшісі, 7 213 полицей және 4 203 Қарулы полиция күштерінің жауынгері бар.
Билік өкілдерінің мәлімдеуінше, қазіргі уақытта 8 186 адам құтқарылған. Апаттың ауқымы қаза тапқандарды анықтауда үлкен қиындықтар туғызуда: танылмаған мәйіттер елдің әртүрлі аймақтарындағы 21 ауруханаға сақтау және кейіннен тану үшін жіберілді.
Еске сала кетейік, 26 тамызда Қытай мен Непал арасындағы шекара өткелінің маңында көшкін жүріп, жол қозғалысы, байланыс және электрмен жабдықтау бұзылған еді. Кейіннен жер сілкінісі мен одан кейінгі көшкіннен туындаған қатты су тасқыны адамдардың жаппай хабар-ошарсыз жоғалуына әкелді.
Кеше Қазақстаннан келген туристің іздестіріліп жатқаны белгілі болды, ол туристік топ құрамында Қытайдан Непалға шекарадан өткен еді. Бүгін Сыртқы істер министрлігі тағы бір қазақстандық әйелдің іздестіріліп жатқанын хабарлады.
Соңғы мәліметтер бойынша, жағасынан асқан көлге байланысты Непалдағы құтқару жұмыстарын уақытша тоқтатуға тура келді.