Америкалық Netflix стриминг сервисі әлем бойынша мыңға жуық қызметкерін жұмыстан шығаруды жоспарлап отыр. Бұл компания штатының шамамен 6 пайызы және 2022 жылдан бергі ең ауқымды қысқарту толқыны. Алайда сервис миллиардтап табыс тауып, жобаларын кеңейтіп келеді, деп хабарлайды infohub.kz сайты.
Өткен жылы компанияда 16 мыңға жуық адам еңбек еткен. Енді басшылық шығындар мен қызметкерлерді бөлуді қайта қарауды ұйғарды. Қысқартуға шамамен мың адам ілігеді.
Бірлескен бас директорлар Тед Сарандос пен Грег Питерс командаға компанияның жағдайы жақсы екенін және жылдық қаржы жоспарын орындауға ниетті екенін жеткізді. Сонымен қатар Netflix ең перспективалы деп санаған бағыттарға назар аудармақ.
Ал сервистің айналысатын ісі жеткілікті. Әдеттегі фильмдер мен сериалдардан бөлек, ол бейнеойындар, подкасттар және спорттық іс-шаралардың тікелей трансляцияларын дамытып келеді. 2025 жылы Netflix шамамен 45,2 миллиард доллар табыс тапты, әрі жыл ішінде жазылым бағасын да көтерді.
Демек, түсімнің өсуі мен жаңа жобалар да компанияның командасын кеңейтетініне кепілдік бермейді. Медиагигант табыс табудың жаңа жолдарын іздестіруді жалғастырып отыр, бірақ сонымен бірге қызметкерлерге жұмсалатын шығынды қысқартуда.
Бұған дейін Kursiv LifeStyle GTA 6 ақпаратының таралуына байланысты Rockstar ойын студиясы кеңсе терезелерін жапсырып, қызметкерлерін жұмыстан шығарып жатқанын жазған еді.