Оңтүстік Корея президенті Ли Чжэ Мён Солтүстік Кореяға Корей соғысын ресми түрде аяқтау және Пхеньянның ядролық бағдарламасын тежеу шараларын талқылау үшін келіссөздер бастауды ұсынды, деп хабарлайды infohub.kz сайты.
Бұл туралы ол Кореяның Жапония отаршылдығынан азат етілгеніне 81 жыл толуына орай сөйлеген сөзінде мәлімдеді, деп хабарлайды Yonhap.
«Бір-бірімізге қауіп төндіру ниетінен бас тартып, осы созылған соғысты аяқтау мәселесін тікелей қатысушы тараптар ретінде талқылауды бастайық», — деді Ли.
Оның айтуынша, ықтимал диалог аясында тараптар Солтүстік Кореяның ядролық әлеуетін дамытуды тоқтатудың «тиімді жолдарын» талқылай алады.
Корей түбегі формальды түрде соғыс жағдайында қалып отыр. 1950–1953 жылдардағы Корей соғысы бітім туралы келісімге қол қоюмен аяқталды, бірақ тараптар арасында бейбіт келісім жасалмады. Сондықтан техникалық тұрғыдан Оңтүстік және Солтүстік Корея әлі күнге дейін соғыс жағдайында.
Ли Чжэ Мён «тұрақсыз бітім жүйесін» тұрақты бейбіт режиммен ауыстыруға ұмтылатынын мәлімдеді. Президент Сеул мен Пхеньянды бір-бірінің жүйелерін құрметтеуге және қажетсіз қарама-қайшылықтан бас тартуға шақырды. Ол екі ел өкілдері бейбіт қатар өмір сүру және өзара даму үшін келіссөз үстеліне отыра алады деген үміт білдірді.
«Мен дұшпандық пен қарама-қайшылық энергиясын бейбіт қатар өмір сүру мен өзара өсуге серпінге айналдырамын», — деді оңтүстіккореялық көшбасшы.
Сонымен қатар, Пхеньян Ли Чжэ Мён билікке келгеннен бері (былтырғы маусым) Сеулдің бірнеше рет жасаған диалог ұсыныстарына әлі жауап берген жоқ. Оған қарамастан, Оңтүстік Корея билігі келіссөздер бағытын жалғастыру ниетін білдіруде.
Бұған дейін «Курсив» Оңтүстік Кореяның 2030 жылға қарай Айға қонғысы келетінін жазған болатын. Ал кеше Ли Чжэ Мён X әлеуметтік желісінде ресми мәлімдеме жасап, Қазақстан президенті Қасым-Жомарт Тоқаев пен ҚР Ұлттық қауіпсіздік комитетіне телефон алаяқтарымен күресте көмек көрсеткені үшін алғыс білдірді. Дауыстық фишингпен айналысқан кореялық қылмыстық топ мүшелері Камбоджа мен Вьетнам арқылы өтіп, әділеттен жасырынуға тырысқан, алайда Қазақстан аумағында табылып, ұсталған болатын.