Оңтүстік Кореяның оңтүстік-шығысындағы Кёнсан провинциясында нөсерлі жаңбыр салдарынан жүрген көшкін бір адамның қазасына, екі адамның жарақат алуына себеп болды. Бұл туралы infohub.kz сайты хабарлайды.
Дүйсенбі таңертең Кодже қаласындағы тұрғын үй кешенінің бірінші қабатын көшкін басып қалған. Құтқарушылар үш адамды қираған үйінділердің астынан алып шықты, алайда олардың бірі кейіннен қайтыс болды деп жергілікті БАҚ хабарлады.
Бұл апат Қытай, Жапония және Филиппиннің кейбір аймақтарында рекордтық жаңбырдан туындаған су тасқыны мен көшкіндер тіркелген кезеңге сәйкес келіп отыр. Кодже қаласында бір сағат ішінде 124,5 миллиметр жауын-шашын түскен, бұл Оңтүстік Кореяның метеорологиялық агенттігі 1972 жылдан бері жүргізіп келе жатқан бақылау тарихындағы ең жоғары көрсеткіш болып табылады.
Жексенбіден дүйсенбіге қараған түні Коджеде 400 миллиметрден астам жаңбыр жауды. Әлеуметтік желілерде тасқын су көшелерді шайып, көліктерді су астында қалғанын көрсететін видеолар тарады. Қала әкімдігі қатты жаңбырға байланысты дүйсенбіде кейбір туристік нысандардың жабылатынын мәлімдеді.
Сондай-ақ, су басқан немесе зақымдалған жолдарға байланысты автобус қатынасы мен тұрмыстық қалдықтарды жинау уақытша тоқтатылды. Жексенбі күні билік тұрғындарды көлікпен жүруден бас тартуға, өзен жағалаулары сияқты қауіпті жерлерден аулақ болуға және қажет болған жағдайда қауіпсіз аймақтарға эвакуациялануға шақырды.