Оралда Ұлы Отан соғысының ардагері, 1945 жылғы Жеңіс шеруіне қатысқан, «Халық Қаһарманы» атағын алған Иван Степанович Гапич 103 жасында өмірден өтті, деп хабарлайды infohub.kz.
Иван Гапич 1941 жылы майданға өз еркімен аттанып, бүкіл соғысты байланысшы болып өткен. Ол Украинаны, Беларусьті, Польшаны және Чехословакияны азат етуге қатысып, Кенигсбергке дейін жеткен. Көрсеткен ерлігі мен қаһармандығы үшін ІІІ дәрежелі Даңқ ордені, ІІ дәрежелі Отан соғысы ордені, Қызыл Жұлдыз ордені және басқа да мемлекеттік наградалармен марапатталған.
Оның өмірбаянында ерекше орын алатыны — 1945 жылы 24 маусымда Қызыл алаңда өткен тарихи Жеңіс шеруіне қатысуы. 2023 жылы Иван Степановичке Қазақстан Республикасының ең жоғары атағы — «Халық Қаһарманы» берілді.
Оралдағы Орыс үйінде Иван Степанович қызметкерлер үшін тек аңызға айналған ардагер ғана емес, сонымен бірге көп жылдар бойы жылы қарым-қатынаста болған адам екенін атап өтті.
«Оны мерекелермен және Жеңіс күнімен құттықтау, қонаққа бару, оның естеліктерін тыңдау, оның өшпес өмірлік күшін, даналығы мен ізгі ниетін көру біз үшін үлкен мәртебе еді», — делінген хабарламада.
Ұйым Иван Степановичтің туған-туыстары мен жақындарына қайғыра көңіл айтып, ол туралы жарқын естелік оны білетіндердің жүрегінде мәңгі сақталатынын атап өтті.