Өскеменде полицейлер жергілікті тұрғынға бір миллион теңгеден астам қарызы үшін іздеу жарияланған әйелдің орнын анықтады, деп хабарлайды infohub.kz сайты.
ІІМ ведомстволық сайтында хабарланғандай, жеке сот орындаушысының қарызгерді іздеу туралы қаулысы Өскемен қалалық полиция басқармасының көші-қон қызметі бөліміне түскен. Әйел 2025 жылдың желтоқсанынан бері өз міндеттемелерін орындаудан жалтарып келген.
Жүргізілген іздестіру іс-шаралары барысында көші-қон қызметінің қызметкерлері 31 жастағы қарызгер әйелдің орнын анықтады. Ол Шымкенттен табылды. Оның орны туралы ақпарат сот орындаушысына қарызды мәжбүрлеп өндіріп алу шараларын қолдану үшін берілді, делінген хабарламада.
Жыл басынан бері Шығыс Қазақстан облысы полиция департаменті іздеуде болған 65-тен астам қарызгердің орнын анықтады.
ШҚО ПД көші-қон қызметі атқарушы құжаттардың талаптарын орындамағаны үшін Қазақстан Республикасының заңнамасында әкімшілік және қылмыстық жауапкершілік қарастырылғанын еске салады, сондай-ақ азаматтарды қосымша санкцияларды болдырмау үшін өз міндеттемелерін уақытылы орындауға шақырады, деп қосты полиция.