P.Diddy лақап атымен танымал Шон Комбс Нью-Джерси штатындағы федералдық түрмеде жазасын өтеп жатыр. Ол ай сайын мыңдаған доллар жұмсап, ерекше қызметтер мен тыйым салынған заттарды пайдаланып жүргені айтылып отыр, деп хабарлайды infohub.kz сайты.
NUR.KZ-тің NBC News-ке сілтеме жасап хабарлауынша, музыканттың «сәнді өмірі» туралы оның блогындағы төрт тұтқын әңгімелеп берген. Олардың айтуынша, Комбске тамақ дайындап, бөлмесін жинап, киімдерін жуып, массаж жасап береді.
«Мұны түрмеде әдетте көре бермейсің. Бұл — бай адамның өмірі», — деп келтіреді NBC News ақпарат көздерінің бірінің сөзін.
Сонымен қатар телеарна сұхбаттастарының дерегінше, Комбс тыйым салынған телефонды пайдаланып жүрген болуы мүмкін. Тұтқындардың бірі музыкантпен бірге Hennessy коньягін ішкенін де айтқан.
Ақпарат көздерінің мәліметінше, P.Diddy ай сайын басқа тұтқындардың қызметіне мыңдаған доллар жұмсайды: олар оған арнайы тағамдар дайындап, бөлмесін жинап, заттарын сақтайды.
Бұған дейін сотталған рэпер Шон Комбстың басқа тұтқынмен төбелескеннен кейін жалғыз камераға ауыстырылғаны хабарланған. Еске салайық, былтыр Комбс бұрынғы қыз досы мен тағы бір әйелді штаттар арасында жезөкшелікпен айналысу үшін тасымалдағаны бойынша федералдық айыптаулар бойынша кінәлі деп танылған. Алайда сот оны қылмыстық сөз байласу мен жыныстық қанау мақсатында адам саудасына қатысты неғұрлым ауыр айыптаулар бойынша ақтаған.
Сот музыкантты 50 айға бас бостандығынан айырды. Қазіргі таңда ол Нью-Джерси штатындағы Форт-Дикс федералдық түзеу мекемесінде жазасын өтеп, шығарылған үкімге шағымдануға тырысып жүр.