Армения премьер-министрі Никол Пашинян елдің Еуразиялық экономикалық одақ (ЕАЭО) пен Еуропалық одақ (ЕО) арасындағы таңдаумен шектелмеуі керектігін, үшінші баламаның пайда болуы мүмкін екенін айтты, деп хабарлайды infohub.kz сайты.
News.am-ның хабарлауынша, брифингте Пашинян ЕАЭО мен ЕО Армения үшін бірдей маңызды екенін, билік нақты баламаларды ұсынбайынша және азаматтар саналы таңдау жасай алмайынша, бұл екі ұйымның маңызы зор екенін атап өтті. Оның айтуынша, армян қоғамы тек осы екі интеграциялық блоктың арасында таңдау жасаумен шектелмеуі тиіс.
«Халық таңдау жасау мүмкіндігіне ие болуы керек, бірақ ЕАЭО-ға да, ЕО-ға да қатысы жоқ үшінші бастаманың пайда болуы әбден мүмкін, өйткені біз міндетті түрде бір жерге кіруіміз керек деп ешкім айтқан жоқ», — деді Армения премьер-министрі.
ТАСС-тың жазуынша, Пашинян ЕО-ға мүшелік мәселесі бойынша референдум дайындық жұмыстары жүргізіліп, бірлестікке кіруге ресми өтінім берілгеннен кейін ғана ұйымдастырылатынын да мәлімдеді. «Біз осы екі нұсқаны атаймыз, бірақ тағы бір бастама болуы мүмкін: ЕАЭО да, ЕО да емес. Үшінші нұсқа да болуы мүмкін. Біз Армения азаматтарына баламалар жасағымыз келеді, халық өзі таңдасын, бірақ бүгін біз төртінші балама, бесінші балама туралы ойлауды тоқтатпаймыз, өйткені Армения ешкімге керек емес, оның барар жері жоқ деп ешкім айтпауы керек», — деп қосты Пашинян.
Бұған дейін Никол Пашинян елдің ЕАЭО мен ЕО-ға бір мезгілде мүше болуы мүмкін емес екенін айтқан болатын.