Алматы – Астана бағытындағы рейстің жолаушысы FlyArystan әуекомпаниясының ережелеріне наразылығын әлеуметтік желіде білдірді. Оның айтуынша, ұшу екі сағатқа кешіктірілген. Бұл оқиға жолаушылардың бірінің қол жүгінің нормадан асып кетуіне байланысты болған, деп хабарлайды infohub.kz.
Threads әлеуметтік желісінде elmara_duisenbayeva атты қолданушы FlyArystan рейсінің екі сағатқа кешіктірілгенін, себебі жолаушылардың бірінің қол жүгінде проблема болғанын жазды. Оның сөзінше, салмақ 400 граммға артық болғандықтан, 200-ден астам адам отырған ұшақты бортында 50 минуттай ұстаған, ал рейстің өзі екі сағатқа кешіктірілген. Жолаушы артық салмақ үшін 11 мың теңге айыппұл төлеген, бірақ содан кейін барлығын түсіріп, қайтадан тексеруден өткізген. 00:50-де ұшу 01:30-ға ауыстырылғаны хабарланған, алайда қайта тексеру сол уақытта басталмаған. Автор әуекомпаниядан SMS алғанын, онда тасымалдаушы жауапкершілікті өзінен алып тастайтынын айтқан.
Пост астындағы пікірлерде FlyArystan баспасөз қызметі жағдайды түсіндірді. 24 тамызда FS7063 рейсі Алматы – Астана бағытында ұшу алдында жолаушы белгіленген тасымалдау ережелерін бұзып, тәртіпсіздік көрсеткен. Әуе кемесінің командирі ұшу қауіпсіздігін қамтамасыз ету үшін бұл жолаушыны тасымалдаудан бас тарту туралы шешім қабылдаған. Жолаушыны рейстен шығаруға байланысты авиациялық қауіпсіздік талаптарына сәйкес барлық жолаушылар түсіріліп, әуе кемесіне қайтадан алдын ала тексеру жүргізілген. Қажетті процедуралар аяқталғаннан кейін жолаушылар қайтадан отырғызылған. Нәтижесінде ұшу 1 сағат 52 минутқа кешіктірілген.
FlyArystan жолаушылардан мәжбүрлі күту мен кешіктіруге байланысты қолайсыздықтар үшін кешірім сұрап, бұл шаралардың ұшу қауіпсіздігін қамтамасыз ету үшін міндетті екенін атап өтті.