Павлодарда 15 шілдеде өрескел оқиға болды: егде ер адам мен әйел банк бөлімшесіне петарда салынған торт әкеліп, ол жарылды. Зейнеткерлер жеңіл жарақат алды. Алдын ала мәліметтер бойынша, олар телефон алаяқтарының нұсқауымен әрекет еткен, деп хабарлайды infohub.kz сайты.
Павлодар облысы полиция департаментінің мәліметінше, зейнеткерлер бұған дейін алаяқтардың құрбаны болып, жалған инвестициялық жобаларға ақша салған. Осы факті бойынша тергеу жүргізілуде, дроппер рөлін атқарған адамдар анықталды. Сот арқылы ұрланған қаражатты қайтару шаралары қабылдануда.
Алайда алаяқтар мұнымен тоқтамады. Олар зейнеткерлерге қайта хабарласып, ақшаларын қайтара алатындарын айтты. «Психологиялық әсер ету әдістерін қолданып, олар зейнеткерлерді торт пен петарда сатып алуға көндірді. Алаяқтардың нұсқауымен зейнеткерлер тортқа салынған петарданы тұтатты», — деп хабарлады полицияда.
Қылмыстық істер қозғалып, күдіктілер іздестірілуде. Полиция ескертеді: егер адам алаяқтардан зардап шеккен болса, оны қайтадан алдауға тырысуы мүмкін. Қылмыскерлер ақшаны қайтаруға, өтемақы немесе дивиденд төлеуге уәде береді, үлкен ұтыс туралы хабарлайды. Бұл — алаяқтық схеманың жалғасы. Әсіресе егде жастағы адамдар психологиялық қысымға жиі ұшырайды.
Азаматтарды үлкен туыстарына ескертуге шақырады: банк, мемлекеттік органдар, құқық қорғау органдары және инвестициялық компаниялардың қызметкерлері ешқашан қауіпті әрекеттер жасауды, ақша аударуды немесе бейтаныс адамдардың телефондағы нұсқауларын орындауды талап етпейді.