Павлодар қала тұрғындары мен қонақтарын тағы да таңғалдырды: әкімдіктің қолдауымен өткен LowKZMeet ауқымды автофестивалі Қазақстанның түкпір-түкпірінен 150-ден астам эксклюзивті автокөлікті және ондаған мың көрерменді жинады. Әдетте ақылы болатын іс-шараға кіру биыл барлық қонақтарға тегін болды, деп хабарлайды infohub.kz сайты.
LowKZMeet Қазақстанда он жылдан бері өткізіліп келеді. Ұйымдастырушылардың айтуынша, фестиваль бастапқыда стихиялы түрде пайда болған: бәрі заңсыз басталған, бірақ уақыт өте келе іс-шара жарқын автокөлік шоуларын сүйетіндер үшін үлкен мерекеге айналды.
«10 жыл ішінде алғаш рет автофестиваль Павлодарда қала әкімдігінің қолдауымен өтіп жатыр. Тіпті қала әкімі Хасар Хабылбековтің бастамасымен деп айтар едім. Іс-шараға Қазақстанның әртүрлі аймақтарынан 150-ден астам жарқын әрі эксклюзивті көлік жинадық. Қатысушылар өз көліктерін, жүргізу шеберліктерін көрсету үшін келді. Соның ішінде барлық қонақтарға дрифт-такси ұйымдастырған кәсіби дрифтерлер де бар», — деді LowKZMeet автофестивалінің негізін қалаушысы әрі бас ұйымдастырушысы Дархан Искаков.
Ұйымдастырушылар фестивальдің бірнеше мақсаты барын атап өтеді. Ең алдымен, бұл келушілерге арналған жарқын шоумен үлкен мереке ұйымдастыру. Іс-шараға халықтың әртүрлі топтары қызығушылық танытады. Сонымен қатар, спортшылар мұнда қала көшелерінде ереже бұзбай-ақ «буын шығара» алады. Жүргізу мәдениетін насихаттау және Жол қозғалысы ережелерін сақтау — фестивальдің басты міндеттерінің бірі.
Павлодарлық спортшылар жыл сайын басқа қалалардағы осындай шоуларға қатысады. Павлодарда нағыз шоу көрсете алатын кәсіби дрифтерлер аз емес. LowKZMeet-ке 9 жасынан бері көлік тізгіндеп келе жатқан 17 жастағы Темірлан қатысты. Жігіт көрермендерді өзінің басқару шеберлігімен таңғалдырып, көпшілік сияқты BMW-де емес, «Жигулиде» дрифт-шоу көрсетті.
«Жергілікті жарыстарға қатысамын: дрифт, дрифт-такси, ралли, қысқы дрифт — барлығына қатысуға тырысамын. Әзірге жүргізуші куәлігім жоқ, тек осында арнайы алаңдарда жүруіме рұқсат. Әкем мені қолдап, алып келеді. Көлікті өзім жинадым», — деді павлодарлық Темірлан Сейтказинов.
Фестивальде бірнеше алаң жұмыс істеді: сирек кездесетін көліктер көрмесі, балалар аймағы, PlayStation ойындары. Қонақтар дрифт-таксиге отыра алды. Бұл идеяны Павлодар облысының әкімі Асайын Байханов та қолдады, ол да дрифт-шоуда жолаушы болды.
«Ұйымдастырушыларға, кештің хедлайнерлері — Omerta бірлестігіне, қатысушыларға және Қазақстанның әртүрлі қалалары мен басқа елдерден келген барлық қонақтарға рахмет. Сіздер павлодарлықтарға жарқын мереке, керемет көңіл-күй және ұмытылмас эмоциялар сыйладыңыздар», — деді Павлодар қаласының әкімі Хасар Хабылбеков.
Автофестиваль аясында стритбол және FIFA 2026 турнирлері де өтті. Іс-шара күні бойы жалғасып, ондаған мың павлодарлық пен қала қонақтарын жинап, жаздың ең жарқын оқиғаларының біріне айналды.
Әдетте фестиваль ақылы өтеді, билет бағасы 8–10 мың теңгеден басталады. Алайда Павлодарда бәрі әкімдік пен демеушілердің қолдауымен ұйымдастырылды. Мерекенің хедлайнерлері Truwer, Niman, Captown және Экси болды.