Павлодар облысының мамандандырылған ауданаралық әкімшілік соты салық тексеруінің нәтижесі бойынша шығарылған хабарламаны рәсімдік бұзушылықтардың көптігіне байланысты жойды, деп хабарлайды infohub.kz сайты.
Жоспардан тыс тақырыптық салық тексеруіне талапкердің жеке кәсіпкермен есеп айырысулары негіз болды. Осы кәсіпкерге қатысты салық органы бұған дейін электрондық шот-фактураларды жазуды шектеуді қолданған болатын.
Сот отырысы барысында тексеру жүргізу тәртібінің көптеген бұзылғаны анықталды. Атап айтқанда, сот әкімшілік рәсім мен тыңдау рәсімінің тиісті емес мемлекеттік органмен жүргізілгенін, хаттамада міндетті қолтаңбалардың болмағанын, ал салық тексеруінің пәнінің жеткілікті түрде нақты анықталмағанын анықтады.
Сонымен қатар, сот салықтық зерттеуді жүргізу және ресімдеу тәртібінің бұзылғанын, салықтық зерттеу актісінің даналары арасында қайшылықтар бар екенін, хабарламада әртүрлі салық есептеу сомалары көрсетілгенін, сондай-ақ Салық кодексінде белгіленген тексеру жүргізу мерзімінің сақталмағанын анықтады.
Сот жіберілген әкімшілік рәсім бұзушылықтары қабылданған әкімшілік актінің заңдылығына әсер етуі мүмкін деген қорытындыға келді. Осыған байланысты салық тексеруінің нәтижелері туралы хабарлама заңсыз деп танылып, жойылды.
Сот шешімімен әкімшілік талап қанағаттандырылды. Мемлекеттік кірістердің аумақтық органынан талапкердің пайдасына мемлекеттік баж салығын төлеу бойынша сот шығыстары өндірілді. Сот актісі заңды күшіне енді.