Павлодар тұрғыны жалпы пайдаланудағы жерді жеке меншікке беру туралы шешімнің күшін жойды. Әкімшілік істер жөніндегі кассациялық сот қала тұрғынының біріне қосымша жер учаскесін берудің заңдылығы туралы дауды қарады, деп хабарлайды infohub.kz сайты.
Көрші учаскенің иесі сотқа жүгініп, даулы аумақ жалпы пайдаланудағы жерге жататынын, онда инженерлік коммуникациялар орналасқанын және тұрақ жабдықталғанын көрсетті. Ол әкімдіктің қаулысына дау айтып, оның заңнаманы бұза отырып шығарылғанын мәлімдеді.
Бірінші және апелляциялық сатылардағы соттар талапты қанағаттандырудан бас тартты, алайда кассациялық саты керісінше қорытындыға келді. Сот әкімдік қаулысы қабылданған кезде жер учаскесі шынымен жалпы пайдаланудағы жерге жатқанын, оның мәртебесін өзгерту рәсімі жүргізілмегенін, ал учаскені беру келісілген кезде жер заңнамасының талаптары сақталмағанын анықтады. Сонымен қатар, төменгі сатыдағы соттар инженерлік коммуникациялардың болуына және істің басқа да маңызды мән-жайларына тиісті баға бермеген.
Кассациялық сот мемлекеттік орган шешімінің заңдылығы ол қабылданған кезде қолданыста болған заңнамаға сәйкес бағалануы тиіс екенін атап өтті. Сенімді қорғау принципі заңға қайшы келетін әрекеттерді ақтай алмайды.
Қарау нәтижесінде кассациялық сот төменгі сатыдағы сот актілерін жойып, талапты қанағаттандырып, әкімнің жер учаскесін беру туралы қаулысын заңсыз деп таныды.