Лима әуежайында Германияға жеткізілуге тиіс 3 мыңнан астам тарантула тәркіленді. Бұл туралы Перу билігі мәлімдеді, деп хабарлайды infohub.kz сайты.
Өрмекшілерді екі Германия азаматы мен бір Польша азаматы алып жүрген үш чемодандағы кір шұлықтардың ішіне жасырған. Бұл жайында Перу ұлттық орман және жабайы табиғат қызметі (SERFOR) бейсенбі күні Франс Пресс агенттігіне хабарлады.
Халықаралық әуежайдағы кедендік тексеру кезінде қызметкерлер жүк ішіндегі әдеттен тыс қозғалысты байқап, оларды ұстап алды. «Кейбіреулерінің қозғалып жатқанын байқадық. Кішкентайлары да, үлкендері де болды», — деді SERFOR-дың жабайы табиғатты бақылау жөніндегі технигі Кора Суарес.
Жаңадан шыққан өрмекшілер шұлықтың ішіне жасырылған болатын. Суарестің айтуынша, Еуропада бір тарантула шамамен 500 еуроға (560 доллар) сатылады, демек, бір сапардағы заңсыз сауда схемасының құны 1,5 млн еуроға жетуі мүмкін еді.
Перудің бірнеше аймағынан жиналған жасырылған өрмекшілер дамудың әртүрлі сатысында — жұмыртқадан бастап жаңа шыққандары мен ересектеріне дейін кездесті, деді Суарес.
Тарантулаларды заңсыз тасымалдаған деп айыпталған еуропалықтарды экологиялық қылмыстарға маманданған полиция ұстады, олар қылмыстық іс жүргізуге тартылады, деп хабарлады SERFOR.
Интерпол деректеріне сәйкес, жабайы табиғатты заңсыз саудалау — дүниежүзінде жылына шамамен 20 млрд доллар табыс әкелетін аса табысты қылмыстық қызмет. Мұндай сауда планетадағы биоалуантүрліліктің жойылуының негізгі себептерінің бірі саналады.