Петропавлда ұзақ сақталатын донат пен нан-тоқаш өнімдерін шығаратын Bakerton зауытының құрылысы аяқталды. Жобаның құрылыс және инженерлік бөлігін BI Group құрамына кіретін BI-Industrial компаниясы жүзеге асырды, ал өндірістік ғимараттың ауданы шамамен 17 мың шаршы метрді құрады, деп хабарлайды infohub.kz сайты.
Кәсіпорын Qyzyljar арнайы экономикалық аймағының аумағында орналасқан. Зауыттың жобалық қуаты — жылына шамамен 13 мың тонна өнім, мұнда 380-ге жуық тұрақты жұмыс орнын құру көзделген.
Құрылыс барысында BI-Industrial командасы негізгі өндірістік корпусты тұрғызып, ішкі және сыртқы инженерлік жүйелер мен қажетті қосылымдарды орындап, ілеспе инфрақұрылым жасап, аумақты абаттандырды. Компания мамандары сондай-ақ ғимараттың инженерлік жүйелерін іске қосу-реттеу жұмыстарының кешенін жүргізді.
Барлығы құрылыс кезінде шамамен 4,3 мың текше метр бетон жұмысы орындалып, 1 950 тоннаға жуық металл конструкциялары орнатылды. Ең қарқынды кезеңде алаңда бір уақытта 218 маманға дейін жұмыс істеді.
Жобаның басты ерекшеліктерінің бірі — тағам өндірісіне қойылатын жоғары талаптар болды. Құрылысшылардың алдында жай ғана жылы әрі герметикалық корпус емес, сәулеттік және инженерлік шешімдер қажетті санитарлық режимді ұстауға көмектесетін бақыланатын өндірістік орта құру міндеті тұрды.
Осылайша, өндірістік үй-жайлардағы сэндвич-панельдер шаң жиналуы мүмкін көлденең түйіспелер мен беттердің санын азайту үшін тік орнатылды. Қабырғалар еденге жалғасқан жерлерде стандартты бұрыштардың орнына біркелкі радиусық ауысулар жасалды — бұл үй-жайларды санитарлық өңдеуді тиімдірек жүргізуге мүмкіндік береді.
Ішкі контурдың герметикалығына ерекше назар аударылды. Түйіспелер, жалғасулар мен төбе панельдері технологиялық процестің тұрақты температуралық жағдайын ұстау үшін қосымша герметизацияланды. Өндірістік үй-жайларда сондай-ақ ашық металл конструкциялар, шығыңқы элементтер және санитарлық өңдеуге қиын жететін басқа аймақтар барынша жойылды.
«Тағам өндірісінде құрылыс сапасы болашақ технологиялық процессімен тікелей байланысты. Мұнда жекелеген түйіспелер мен жалғасуларға дейінгі шешімдердің маңызы зор. Сондықтан біздің міндетіміз жай ғана өндірістік корпус салу емес, тапсырыс берушінің технологиясын орналастыру мен іске қосу үшін толық дайын инженерлік орта құру болды», — деді BI-Industrial жоба жетекшісі Ғабиден Енсебаев.
Нысандағы жұмыстар кезең-кезеңімен орындалды. Бастапқыда BI-Industrial ғимараттың негізгі контурын салуға жауапты болды. Кейіннен компанияның жауапкершілік аймағы кеңейіп, ішкі және сыртқы инженерлік жүйелерді, қосылымдарды, инфрақұрылымды және аумақты абаттандыруды қамтыды.
Конструкциялар мен инженерлік коммуникацияларды үйлестіру үшін команда 3D-модельдеуді пайдаланды, бұл алаңда тиісті жұмыстарды орындамас бұрын техникалық шешімдерді алдын ала пысықтап, әртүрлі жүйелерді байланыстыруға мүмкіндік берді.
Өндірістік желілердің технологиялық жабдығы тапсырыс беруші тарапынан сатып алынып, бейінді жеткізушілер орнатты. BI-Industrial өз тарапынан өндірістік жабдықты интеграциялау және зауытты кейіннен іске қосу үшін кәсіпорынның құрылыстық және инженерлік дайындығын қамтамасыз етті.
Bakerton жобасы BI-Industrial компаниясының өндірістік нысандар портфелін толықтырды. Бүгінде компания Қазақстанда тағам өнеркәсібінен бастап мұнай-химия, химия өндірісі және энергетикаға дейінгі әртүрлі салалардағы ірі өндірістік жобаларды іске асыруға қатысады. Дивизионның тапсырыс берушілері мен серіктестерінің қатарында PepsiCo, Silleno, Qazaq Soda, Masdar және басқа да халықаралық әрі қазақстандық компаниялар бар. Bakerton тәжірибесі BI-Industrial компаниясының құрылыстық және инженерлік шешімдерге қойылатын талаптар болашақ технологиялық процестің бөлігі болып табылатын тағам өнеркәсібі кәсіпорындарын салу саласындағы құзыретін кеңейтті.