Петропавлда көктем сайын су тасқынынан зардап шегетін «Заречный» шағын ауданын толық жабу жоспарлануда. Тұрғындарды көшіру басталып кетті, деп хабарлайды infohub.kz.
Телеарнаның мәліметінше, «Заречный» шағын ауданының тұрғыны, жаңа пәтер кілтін алған 72 жастағы Евгения Шелуткова осы ауданда 30 жылдан астам тұрған, бірақ көшіп кетуге қуанышты.
«Алдын ала уайымдайсың: су қандай болады, қалай басады деп. Әрине, көктемді алаңдап күтеміз. Енді бізге бұл қатысты болмайды. Енді тамаша болады, тыныш өмір сүреміз», — деді петропавлдық Евгения Шелуткова.
«Заречный» тұрғындары үшін екінші көпқабатты үй салынған. 90 пәтерге есептелген біріншісі былтыр пайдалануға берілген еді. Енді мұнда тағы 72 отбасы көшіп келеді.
«2017 жылы су тасқыны болды, 2024 жылы да болды, жыл сайын алаңдап, көктемді қорқып қарсы алдық, өйткені бұл өте қорқынышты тасқын. Көп жағымсыз сәттерді бастан өткердік. Енді алаңдаудың қажеті жоқ, жамандық туралы ойланудың қажеті жоқ», — деді петропавлдық Уазипа Уваисова.
«Заречный» ауданында 266 отбасы тұрады. Оның 10-нан сәл астамы көшуден бас тартты. Көшіру кезең-кезеңімен жүргізілуде. Әкімдік өкілдерінің айтуынша, жақын арада мұнда тағы бір жаңа үйдің құрылысы басталады.
«Көшірілетін жеке үйлерді, баракаларды біз бұзамыз. Ал үш қабатты үйлерге келсек, оларды бір жыл, мүмкін ең көбі екі жыл ұстап тұрамыз. Содан кейін ғана бұзамыз. Әзірге бұл үйлерді тұрғын үйге мұқтаж адамдарға береміз. Олар ақша жинай алуы үшін уақытша береміз. Бірақ жалпы, ауылды біртіндеп босатамыз деп ойлаймын», — деді Петропавл әкімі Серік Мұхамедиев.
«Заречный» қаланың шетінде, Есіл өзенінің бойында орналасқан. Әлеуметтік нысандардан басқа, мұнда түзеу мекемесі де бар. Болашақта колонияны да басқа жерге көшіру жоспарлануда.