Петропавлда 21 жастағы жергілікті тұрғынға қатысты сот процесі аяқталды. Ол төрт ер адамды зорлады деп айыптаған, алайда өзі жалған айғақ бергені үшін сот алдында жауап берді, деп хабарлайды infohub.kz.
Жетінші арнаның мәліметінше, оқиға былтыр болған. Қыз полицияға қаладағы пәтерлердің бірінде төрт ер адам оны еркіне қарсы ұстап, оның екеуі оған қатысты жыныстық сипаттағы зорлық-зомбылық жасағанын хабарлаған. Оның арызы негізінде қылмыстық іс қозғалған.
Алайда сот тергеуі барысында жәбірленуші күтпеген жерден айғағын өзгертіп, жыныстық қатынасқа ерікті түрде түскенін мәлімдеп, арызын қайтарып алуға тырысқан. Тергеу барысында анықталғандай, ол айғағын өзгерткені үшін ер адамдардан 1,5 миллион теңге талап еткен.
Нәтижесінде қыздың өзіне қатысты әдейі жалған айып таққаны үшін қылмыстық іс қозғалған. Сот оны кінәлі деп танып, бес жылға бас бостандығынан айыру жазасын кескен. Алайда амнистия заңына сәйкес жаза жеңілдетілген: мерзім үштен біріне қысқартылып, оның бұрын соттылығы болмағаны, кінәсін мойындап, өкінгені ескеріліп, оған 3 жыл 4 айға бас бостандығынан айыру жазасы шартты түрде, пробациялық бақылау орнатылып берілген.
Прокуратура бөлімінің бастығы Ерлан Жамулдинов түсіндіргендей: «Ауыр қылмыс болғандықтан, мерзімді үштен біріне қысқарттық. Және оның жеке басын ескере отырып, яғни ол бұрын сотталмаған, іс бойынша жеңілдететін мән-жайлар бар, бұл кінәсін мойындау және өкіну, сондықтан пробациялық бақылау орнатылып, шартты түрде сынақ мерзімі берілді. Егер ол оны бұзса, тиісінше, ол жазасын толық мерзімге бас бостандығынан айыру орындарында өтейтін болады».