Қазақстанда халықтың психикалық денсаулығын сақтау жүйесін жаңғырту жоспарлануда. 2027–2030 жылдарға арналған жаңа кешенді жоспар салдарды емдеуден алдын алуға, бұзушылықтарды ерте анықтауға және адамға көмектің барлық кезеңдерінде қолдау көрсетуге бағытталған, деп хабарлайды inbusiness.kz.
Мәселе үкіметте Премьер-Министрдің орынбасары – Мәдениет және ақпарат министрі Аида Балаеваның төрағалығымен өткен кеңесте талқыланды. Денсаулық сақтау министрі Ақмарал Әлназарованың айтуынша, бүгінде мамандандырылған медициналық-әлеуметтік көмек екі республикалық клиникада, 20 өңірлік психикалық денсаулық орталығында, 98 алғашқы көмек орталығында және 212 ауылдық психикалық денсаулық кабинетінде көрсетіледі.
Сонымен қатар салада амбулаториялық көмек пен медициналық оңалтуды дамыту жалғасуда, балалар психиатриясына арналған төсек-орындар саны артып, кадрлық әлеует нығайтылуда. Дегенмен, инфрақұрылымды жаңғырту және материалдық-техникалық базаны жаңарту қажеттілігі сақталып отыр.
Жаңа жоспар емханалар жұмысына психикалық денсаулық мамандарын біріктіруді, ерте диагностиканы дамытуды, пациенттің жолын цифрландыруды, кадр даярлауды күшейтуді және инфрақұрылымды жаңартуды көздейді. Балалар мен жасөспірімдерге қолдау көрсетуге ерекше назар аударылады.
Сонымен қатар, салалық ведомстволар ғылыми зерттеулерді дамыту, мамандар даярлауды жетілдіру, білім беру бағдарламаларын жаңарту, педагогтар мен психологтардың біліктілігін арттыру бойынша ұсыныстар ұсынды. Басымдықтар қатарында мүгедектігі бар балалар мен ересектерге арналған арнаулы әлеуметтік қызметтер жүйесін және инфрақұрылымды дамыту бар.