Халықаралық зерттеушілер тобы қала құстарының мінез-құлқындағы күтпеген ерекшелікті анықтады: құстарға әйел адам жақындаса, олар ер адам жақындағанға қарағанда ертерек ұшып кетеді. Мұндай айырмашылықтың себептері әзірге белгісіз, деп хабарлайды infohub.kz сайты.
Ауқымды эксперимент Еуропаның бес елінің — Германия, Испания, Польша, Франция және Чехияның саябақтары мен скверлерінде өтті. Бойы мен киім стилі бойынша іріктелген қатысушылар құстарға қарай тура бағытта жүрді. Мамандар ұшу басталатын қашықтықты — адам құс үркіп ұшқанға дейін жақындай алған аралықты тіркеп отырды.
Ер адамдар құстарға әйелдерге қарағанда орта есеппен бір метрге жуық жақынырақ келе алғаны белгілі болды. Бұл заңдылық барлық 2701 бақылауда байқалып, 37 түрге қатысты — олардың қатарында қорқақ сауысқандар да, адамға үйренген шымшықтар, торғайлар, барылдақтар мен кептерлер де болды.
Зерттеу авторлары құстар адамның жынысын бізге көрінбейтін белгілері арқылы ажырата алады деп болжайды. Болжамдар қатарында феромондар сияқты химиялық сигналдар, жүріс ерекшеліктері немесе дене мөлшері бар. Әрі қарай зерттеушілер жабайы жануарлардың қала ортасындағы қауіпті қалай бағалайтынын дәлірек түсіну үшін осы факторлардың әрқайсысын жеке-жеке сынамақ.