Мемлекетке сатқындық жасағаны үшін сотталған Ұлттық қауіпсіздік комитетінің бұрынғы төрағасы Қарим Мәсімовтің Астанадағы сарайы теңгерім ұстаушысын ауыстырды: сәтсіз аукциондардан кейін нысан ақпарат комитетінің жанындағы Ақпараттық талдау орталығына беріліп, енді үйде осы ведомствоның қызметкерлерін орналастыру жоспарланып отыр, деп хабарлайды infohub.kz сайты.
Элиталық тұрғын үй Қараөткел шағын ауданында, Ерейментау көшесі, 1 мекенжайында орналасқан. 2025 жылдың қыркүйегінде Қайтарылған активтерді басқару компаниясы осы сарайды және Мәсімовтің басқа да мүлкін сыйға тарту шарты бойынша республикалық меншікке берді. Сонда үй Ағарту министрлігінің Арнайы және инклюзивті білім беруді дамыту ұлттық ғылыми-практикалық орталығына бекітілген болатын. Компанияда дайын үй мен учаскенің құрылыс шығындарын болдырмауға және қайтарылған активті әлеуметтік міндеттерге тезірек жұмылдыруға мүмкіндік беретінін түсіндірген.
Алайда 2026 жылы сарай Мәдениет және ақпарат министрлігі ақпарат комитетінің Ақпараттық талдау орталығына өтті. Қаржы министрлігі 8 мамырдағы бұйрық пен 20 шілдедегі келісімге сілтеме жасады. «Курсивке» ресми сұранысқа берген жауабында беру себебін атамады.
Жаңа теңгерім ұстаушы үйді кеңсе ретінде алғанын растады. «Нысан қажетті құжаттар рәсімделіп, жоспарланған мақсатты тағайындауға сәйкестендірілгеннен кейін АТО қызметкерлерін орналастыру үшін кеңсе ғимараты ретінде одан әрі пайдалануға берілді», — деп хабарлады Қаржы министрлігінің мемлекеттік мүлік және жекешелендіру комитетінде.
Қандай жұмыстар қажет болатынын және олар қанша тұратынын ведомстволар нақтыламады. Қызметкерлердің Мәсімовтің бұрынғы үйіне көшіп үлгерген-үлгермегені де хабарланбады. Сонымен қатар сарайдың болашақ тағдыры әзірге белгісіз. «Қазіргі таңда нысан АТО теңгерімінде. Оны сату немесе өзге тұлғаға беру туралы шешім қабылданған жоқ», — делінген комитет жауабында.
Бұған дейін сарайды бастапқы бағасы 1,8 млрд теңгемен екі рет сатуға әрекет жасалған, бірақ аукционға ешкім келмеген. Кейін үй қайтадан аукционға қойылып, бағасы 282 млн теңгеге арзандатылып, шамамен 1,6 млрд теңгеге дейін төмендетілді. Оны Астанаға әлеуметтік қажеттіліктер үшін беру идеясы да болды. Алайда елордалық білім басқармасы санитарлық нормаларға сәйкес келмеуіне байланысты үйден бас тартты. Осыдан кейін сарай арнайы және инклюзивті білім беруді дамыту орталығына берілді. Қайтарылған активтерді басқару компаниясында бұл шешімді әлеуметтік қолдау саласындағы мемлекеттік басымдықтармен байланыстырған.
Қарим Мәсімов — Қазақстанның бұрынғы премьер-министрі және ҰҚК-нің экс-төрағасы. 2023 жылдың сәуірінде ол мүлкі тәркіленіп, мемлекеттік қызметте лауазым атқаруға өмір бойы тыйым салынып, 18 жылға бас бостандығынан айырылды. Ол мемлекетке сатқындық жасау, билікті күшпен басып алу және өкілеттіктерін асыра пайдалану бойынша кінәлі деп танылды.