Қазақстанда Yandex Go сервистері арқылы жұмыс істейтін әйел-курьерлерді қолдауға бағытталған пилоттық жоба басталады. Қиын немесе дағдарыстық өмірлік жағдайға тап болған қатысушылар көмек ала алады, деп хабарлайды infohub.kz сайты.
Тиісті меморандумға Еңбек және халықты әлеуметтік қорғау министрлігі, Yandex Qazaqstan компаниясы және «Іскер» қолдау орталығы қоғамдық қоры қол қойды.
Жобаға кемінде төрт апта бойы «Тамақ», Lavka және «Жеткізу» сервистері арқылы тапсырыстарды орындайтын әйелдер қатыса алады. Бірінші кезекте жалғызбасты және көпбалалы аналардың, мүгедектігі бар әйелдердің, ерекше қажеттіліктері бар балалардың аналарының, сондай-ақ ауыр науқас туыстарына күтім жасайтындардың өтінімдері қаралады.
Жағдайға байланысты курьерлерге заңгерлік, психологиялық және гуманитарлық көмек көрсетілуі мүмкін. Сондай-ақ оларға қолжетімді мемлекеттік қолдау шаралары мен әлеуметтік қызметтерді түсінуге көмектеседі. Кейбір жағдайларда медициналық көмек алуға жәрдемдесу қарастырылған.
«Бұл жағдайда біз жеткізу саласындағы жұмысты отбасылық міндеттермен ұштастыратын және қиын өмірлік жағдайға тап болуы мүмкін әйелдер туралы айтып отырмыз. Мұндай жағдайда адамның қайда жүгіну керектігін және қандай көмек ала алатынын түсінуі маңызды», — деді еңбек және халықты әлеуметтік қорғау министрі Асқарбек Ертаев.
Сонымен қатар, жалғызбасты немесе көпбалалы ана мәртебесі немесе басқа да көрсетілген санатқа жататындығы көмек автоматты түрде көрсетілетінін білдірмейді. Әрбір өтінім жеке қаралып, нақты әйелге және оның отбасына қандай қолдау қажет екендігі анықталады.
Өтінімді «Яндекс Про» қосымшасы арқылы беруге болады — ақпарат «Негізгі ынтымақтастық туралы» бөліміндегі «Әйел-курьерлерге көмек» мақаласында орналасқан. Сондай-ақ шарттарды сервистің қолдау қызметі арқылы білуге болады.
Әзірге жоба пилоттық ретінде іске қосылуда. Оның қорытындысы бойынша қатысушылар мұндай көмектің қаншалықты сұранысқа ие екенін және бағдарламаны одан әрі дамыту керектігін бағалайды.
Бұған дейін қазақстандық интернет-сегментінде нәрестесін құшақтап, тапсырыс жеткізіп жүрген әйелдің фотосуреті талқыланған болатын. Сурет Threads-те пайда болып, әлеуметтік желілерде тез тарады. Әйел курьерлік рюкзак киген, баланы алдында ұстаған.
Бұл оқиға үлкен резонанс тудырғаны соншалық, мәселе үкіметтегі брифингте көтерілді. Журналистер еңбек және халықты әлеуметтік қорғау вице-министрі Виктория Шегайдан ведомствоның кішкентай баламен курьер болып жұмыс істеуге мәжбүр болған әйелге қатысты ұстанымын сұрады.