Қазақстанда Кенесары ханның бас сүйегі туралы жанжалды сөздер айтқан Қырғызстандық екі студент қызға қатысты сотқа дейінгі тергеу басталды. Бұл туралы олардың сөздеріне құқықтық баға беруді талап етіп, құқық қорғау органдарына жүгінген адвокат Мейрман Шекейев хабарлады, деп жазады infohub.kz сайты.
Адвокаттың айтуынша, ол қылмыстық істің тіркелгені туралы ресми растауды алған.
«Естеріңізде болса, бұған дейін Қырғызстанның екі азаматы біздің ата-бабаларымызға, елімізге және ұлтымызға қорлайтын сөздер айтқан бейнежазбалар жариялаған еді. Осыған байланысты мен бейжай қалмадым. Бұған дейін аталған азаматтардың әрекеттеріне құқықтық баға беруді талап етіп, тиісті органдарға жүгінгенімді хабарлағанмын. Бүгін Қырғыз Республикасының аталған азаматтарына қатысты сотқа дейінгі тергеу басталғанын мәлімдейміз», — деді Шекейев Instagram-да.
Адвокат тергеу органдары болған жағдайдың мән-жайын анықтап жатқанын қосты. Алайда істің қылмыстық кодекстің қай бабы бойынша тіркелгенін нақтыламады.
«Осылайша, аталған факті бойынша қылмыстық іс тіркелгенін хабарлаймын. Осыған байланысты барлық азаматтарға жүгінгім келеді. Айтпақшы, жаман халық болмайды, жаман адам болады. Сонымен қатар ұлттық болмысымызды, ұлттық мүддемізді және ата-бабаларымыздың рухын қорлау біздің ар-намысымызға, қадір-қасиетімізге тиетінін еске салғым келеді. Кенесары ма, әлде өзге ата-бабаларымыз ба — олардың ұрпақтары бүгінде өмір сүріп жатыр», — деді ол.
«Курсив» редакциясы Астана қалалық полиция департаментіне ресми түсініктеме сұрап жүгінді. Жариялау сәтінде полициядан жауап келмеді.
Бұған дейін Қырғызстандық екі студент қыз өз елінде «Кенесары ханның бас сүйегінен шарап ішеді» деп мәлімдеген болатын. Бейнежазба Қазақстан мен Қырғызстандағы әлеуметтік желі қолданушыларының наразылығын тудырды. Жанжалдан кейін қыздар көпшілік алдында кешірім сұрады.
Сонда Қазақстан президентінің экс-кеңесшісі Олжас Худайбергенов студент қыздарға кешіріммен шектелмей, қазақстандықтарға қан доноры болуды ұсынған еді.