Қазақстанда республикалық және облыстық маңыздағы 40 мың км-ден астам автомобиль жолын мобильді байланыспен қамту жоспарланып отыр. Ол үшін трассаларда 500-ден астам антенна-мачта құрылғылары мен базалық станциялар салынады, деп хабарлайды infohub.kz сайты.
Жобаның іске асырылу барысы премьер-министрдің орынбасары — жасанды интеллект және цифрлық даму министрі Жаслан Мәдиевтің төрағалығымен өткен кеңесте талқыланды. Талқылауға «Транстелеком» АҚ және мобильді операторлардың өкілдері қатысты.
Кеңес қатысушылары телекоммуникациялық инфрақұрылым құрылысының ағымдағы жай-күйін, сондай-ақ инвестор мен байланыс операторларының салынып жатқан нысандарды бірлесіп пайдалану мәселелерін қарастырды.
Автомобиль жолдарында тұрақты радиожабынды қамтамасыз етуге және жобаға қатысушылар арасындағы жұмыстарды үйлестіруге ерекше назар аударылды.
Республикалық трассаларды мобильді байланыспен қамту 2026 жылдың соңына дейін, облыстық жолдарды — 2027 жылдың соңына дейін аяқталуы жоспарланып отыр.
Жобаны «Транстелеком» АҚ қаржыландырады. Оны іске асыру үшін бюджеттік қаражат тарту жоспарланбаған.
Бұған дейін «Курсив» жазғандай, Цифрлық даму министрлігі мен «Транстелеком» АҚ Қазақстанның республикалық және облыстық трассаларын интернетпен қамтуға келіскен болатын. Ол үшін тұрақты байланысы жоқ учаскелерді — «ақ дақтарды» анықтап, қажетті телекоммуникациялық инфрақұрылым салу жоспарланған еді.