Қазақстанда биыл ұйымдасқан қылмыстық топ мүшелеріне қатысты 45 қылмыстық іс сотқа жіберілді. Бұл туралы Ішкі істер министрлігі хабарлады, деп жазады infohub.kz сайты.
«Биыл ұйымдасқан қылмыстық топ мүшелеріне қатысты 45 қылмыстық іс сотқа жіберілді», — деп мәлімдеді ІІМ-де.
Қылмыстардың географиясы мен сипаты әртүрлі болып шықты. Қарағанды облысында қылмыстық топтар кәсіпорындардың мүлкін ұрлаған, Алматыда көліктердің VIN-кодтарын ауыстырған, ал Қызылордада кәсіпкерлерден ақша бопсалаған.
Қарағанды облысында қылмыстық қауымдастықтың ұйымдастырушысы мен он мүшесі тау-кен байыту кәсіпорындарының мүлкін ұрлағаны үшін 13 жылға дейін бас бостандығынан айырылды. Тағы бір іс бойынша ҰҚТ жетекшісі мен төрт мүшесі он жылға дейінгі мерзімге сотталды. Олар ірі кәсіпорынның мүлкін алаяқтық схемалар арқылы ұрлаған.
Алматыда сот ҰҚТ-ның 13 мүшесін сегіз жылға дейінгі мерзімге соттады. ІІМ дерегінше, олар көліктерді заңсыз тіркеп, VIN-кодтары мен ақпараттық жүйелердегі мәліметтерді өзгертіп, сондай-ақ көлік сату кезінде сатып алушыларды алдаған.
Ведомство келтірген деректер бойынша ең ұзақ мерзімді Астанада есірткі сатумен айналысқан топтың ұйымдастырушысы алды — 17 жыл колония. Оның бес сыбайласы 16 жылға дейінгі мерзімге сотталды.
Қызылордада жергілікті криминалитеттің сегіз өкілі жүйелі түрде бопсалағаны, оның ішінде кәсіпкерлерден де бопсалағаны үшін 11 жылға дейін бас бостандығынан айырылды. Тергеу оларға ҰҚТ-ны басқаруды және оның қызметіне қатысуды да тақты.
Бұған дейін «Курсив» ІІМ, ҰҚК және Бас прокуратураның ҰҚТ-ға қарсы бірлескен операциясы туралы жазған болатын. Нәтижесінде елдің 10 өңірінде 29 адам ұсталды. Олардан 25 бірлік қару, 2 граната және 236 бірлік оқ-дәрі тәркіленді.
Сонымен қатар ҚР Бас прокуроры Берік Асыловтың мәлімдеуінше, бірінші жартыжылдықтың қорытындысы бойынша Қазақстанда қылмыс деңгейі жалпы алғанда 11%-ға төмендеген.