23 қыркүйекте Алматы мен Қазақстанның тағы 13 қаласында қолайсыз метеорологиялық жағдай (ҚМЖ) күтіледі. Бұл туралы «Қазгидромет» хабарлады, деп жазады infohub.kz.
Синоптиктердің мәліметінше, ҚМЖ Павлодар, Петропавл, Көкшетау, Ақтөбе және Алматыда, ал түнде Қостанай, Қарағанды, Балқаш, Теміртау, Өскемен, Семей, Риддер, Атырау және Астанада болжанады.
Мамандардың түсіндіруінше, қолайсыз метеожағдай желдің тыныштығы, әлсіз жел, тұман және температуралық инверсия қосылғанда пайда болады. Нәтижесінде ластаушы заттар атмосфераның жерге жақын қабатында жиналып, ауа сапасының нашарлауына әкелуі мүмкін.
Синоптиктер мұндай кезеңдерде денсаулыққа теріс әсер ету қаупі артатынын, әсіресе созылмалы ауруы бар адамдар үшін қауіпті екенін ескертеді.
Ауаның ластану деңгейіне желдің жылдамдығы, жауын-шашын, ылғалдылық және ауа температурасы әсер етеді.
Тұрғындарға сыртта, әсіресе автожолдар мен басқа да ластану көздерінің жанында, аз уақыт болу ұсынылады. Балалар мен жүкті әйелдерге ұзақ серуендеуден бас тарту кеңес етіледі.
Тыныс алу және жүрек-қан тамырлары аурулары бар адамдарға, сондай-ақ аллергиясы барларға қажетті дәрілерді өздерімен алып жүру ұсынылады. Ашық ауадағы дене белсенділігін шектеп, мүмкіндігінше жаттығуларды жабық ғимараттарға көшіру керек.
Бұған дейін «Курсив» 23 қыркүйекте найзағайлы жаңбыр, тұман, шаңды дауыл және желдің 20 м/с-қа дейін күшеюі күтілетінін жазған болатын.