Қостанайда бір пәтерден пышақ жарақатымен табылған иттің өлімі тергелуде. Куәгерлер зооқорғаушыны шақырған, ол құқық қорғау органдарына жүгінген, деп хабарлайды infohub.kz сайты.
«Астана» телеарнасының мәліметінше, еріктілер ит қансырап жатса да, үй иесі оларды пәтерге кіргізбегенін мәлімдеген. Полиция келгеннен кейін ғана итті алып шығу мүмкін болды — оны ветеринарлық клиникаға жеткізді, алайда құтқару мүмкін болмады.
Зооқорғаушы Анастасия Серикова куәгерлерден көмекке мұқтаж питбуль туралы білген. Қатты қансыраған жануар Құрылысшылар клубы ауданындағы бір үйдің пәтерінде болған — ол сол жерге барған.
Анастасияның айтуынша, ол үй иесінен ит тірі болса, оны өзіне беруін сұраған, бірақ әйел көмектесуден бас тартып, былапыт сөйлеп, қорқытқан. Содан кейін зооқорғаушы полиция шақыруға шешім қабылдаған.
«Түнгі сағат екілер шамасында осы пәтердің иесі есікті ашып, итті берді. Ит, әрине, өте ауыр халде еді, меніңше, бұл тескіш, пышақ жарақаттары болды, ол қанға малынған, қысқасы, біз оны бірден алып кеттік, клиникаға апардық, онда ол көз жұмды. Негізінен, қазіргі жағдайға қарағанда, көп уақыт өткен сияқты», — деді Анастасия Серикова.
Итке өлімге әкеп соққан жарақатты кім және қандай мақсатпен салғанын тергеу анықтайды. Оқиғаға полиция түсініктеме берді.
«Ықтимал қатысы бар адам анықталып, полицияға жеткізілді. Қазір қажетті тергеу әрекеттері жүргізілуде. Болған жайдың барлық мән-жайы анықталуда. Тергеу қорытындысы бойынша процестік шешім қабылданады», — деп хабарлады Қостанай облысы полиция департаменті ақпараттық саясат бөлімінің ерекше тапсырмалар жөніндегі аға инспекторы Екатерина Рабцун.
Жануарға қатыгездік жасау фактісі бойынша қылмыстық іс қозғалғаны хабарланды.