Қостанай облысында көлік жүргізу құқығынан айырылған ер адам тағы да мас күйінде рөлге отырды — ақыры бостандығынан айырылды. infohub.kz сайтының хабарлауынша, Лисаковск қалалық сотындағы істің қорытындысы осылай шешілді: бір жыл бас бостандығынан айыру және өмір бойы көлік жүргізу құқығынан айыру.
Қостанай облысы соттарының ресми Telegram-арнасының мәліметінше, сот көлік жүргізу құқығынан айырылған, мас күйінде көлік басқарған ер адамға қатысты қылмыстық істі қарады (Қылмыстық кодекстің 346-бабының 1-бөлігі).
Анықталғандай, 2026 жылдың қыркүйегінде Октябрьский кентінде көлік жүргізу құқығынан айырылған жүргізуші «ВАЗ-21101» көлігін мас күйінде басқарған. Оны полиция қызметкерлері ұстап алды.
Сотталушы кінәсін толық мойындап, жасағанына өкініп, соттан бостандығынан айырмауды сұрады.
Сот қылмыстық жауапкершілік пен жазаны жеңілдететін мән-жайлар ретінде кінәні толық мойындауы мен шын жүректен өкінуін таныды. Ауырлататын мән-жайларды сот анықтаған жоқ.
Жасалған қылмыстық құқықбұзушылықтың сипаты мен қоғамдық қауіптілік дәрежесін, оның орташа ауырлықтағы қылмыстар санатына жататынын, сондай-ақ сотталушының жеке басы туралы деректерді ескере отырып, сот оған 1 жыл бас бостандығынан айыру жазасын кесті және өмір бойы көлік жүргізу құқығынан айырды.
Сотталған адам сот залында қамауға алынды. Үкім заңды күшіне енген жоқ.