Қостанайда жергілікті «Тобыл» футбол клубының легионері қатысқан оқиға тіркелді — ойыншыға шабуыл жасалды. Алайда клуб пен құқық қорғау органдарының дерегінше, ешкім зардап шекпеді, ал жанжал реттелді, деп хабарлайды infohub.kz сайты.
Алғашқыда болған жайт туралы ASnews.kz басылымы жариялады. Оның мәліметінше, Қостанайда «Тобыл» ойыншысы Папе Альюна Ндиайеге шабуыл жасалған. Легионер сол күні қаладан шығып, отанына аттануды жоспарлаған, бірақ жалдаған пәтерінің кіреберісінде Қостанай тұрғынымен жанжалдасып қалған. Басылым төбелес салдарынан футболшының зардап шекпегенін атап өткен.
Кейін болған жайтты футбол клубының баспасөз қызметі растады. Онда жағдайдың тұрмыстық сипатта болғаны және көршілер арасындағы жанжалға байланысты екені атап өтілді.
«Болған жайт тұрмыстық сипатта болды және көршілер арасындағы жанжалға байланысты еді. Жағдай футболшы мен оның отбасы мүшелерін алаңдатты, бірақ, бақытымызға орай, ешкім зардап шекпеді. Бүгінде жанжал толығымен бейбіт жолмен реттелді. Тараптар өзара түсіністікке келіп, бір-біріне талап қоймайды. Болған жайттың мән-жайы құқық қорғау органдарының назарында. Футболшы мен оның отбасы қауіпсіз жерде, олардың өмірі мен денсаулығына ешқандай қауіп төніп тұрған жоқ», — деді клубта.
NUR.KZ тілшісі Қостанай облысы полиция департаментінің баспасөз қызметіне сұрау жіберді. Онда полиция көршілес пәтер тұрғындары арасындағы жанжал фактісін тіркегені мәлім болды. Ведомствоның дерегінше, жанжалды бастаған адамға қатысты ұсақ бұзақылық фактісі бойынша әкімшілік іс қозғалып, материалдар сотқа жіберілді.