Қостанай облысының Мендіқара аудандық соты зейнетақы жинақтарының 16 млн теңгеден астам қаражатын заңсыз аудару туралы қылмыстық істі қарады, деп хабарлайды infohub.kz сайты.
Қостанай облысы соттарының ресми Telegram-арнасында жазылғандай, сотталушы үшінші тұлғалардың пайдасына төлем құралын пайдаланып, материалдық сыйақы үшін ақша аударуды заңсыз жүзеге асырды деп айыпталды. Бұл әрекет ірі мөлшерде жасалған (Қылмыстық кодекстің 232-1-бабының 6-бөлігі).
Сот 2025 жылдың қарашасынан 2026 жылдың қаңтарына дейінгі аралықта сотталушы жеке кәсіпкердің медициналық қызметпен айналысуға қажетті лицензиясы жоқтығын біле тұра, банктен түскен бірыңғай зейнетақы төлемдеріне қатысты ақша операцияларын ұйымдастырғанын анықтады.
Зейнетақы төлемдерін алушылармен жасалған шарттарда көрсетілген медициналық қызметтер іс жүзінде көрсетілмеген. Қаражат жеке кәсіпкердің есепшоттарына түсіп, кейін төлем құралы арқылы алушыларға немесе олар көрсеткен банктік деректемелер бойынша басқа тұлғаларға қайта аударылған.
Осылайша, әйел осындай аударымдарды жасағаны үшін материалдық сыйақы алған. Заңсыз аударылған қаражаттың жалпы сомасы 16 млн теңгеден асқан, бұл қойылған айып пен сот анықтаған мән-жайларға сәйкес ірі мөлшерге жатады.
Сотталушы кінәсін толық мойындады. Жаза тағайындау кезінде сот қылмыстық жауаптылық пен жазаны жеңілдететін мән-жайлар ретінде кінәні толық мойындауды, жасаған әрекетіне шын жүректен өкінуді, кәмелетке толмаған балаларының болуын және өз еркімен келіп мойындауын ескерді. Іс бойынша ауырлататын мән-жайлар анықталмаған.
Сотталушының жеке басын, іс бойынша барлық мән-жайларды, сондай-ақ Қылмыстық кодекстің 55-бабының 2-бөлігінің талаптарын ескере отырып, сот әйелге 2 жылға бас бостандығын шектеу жазасын тағайындады. Кәмелетке толмаған балаларының болуына байланысты және Қылмыстық кодекстің 74-бабының 1-бөлігінің негізінде жазаны өтеу 5 жылға кейінге қалдырылды.
Сондай-ақ сотталған әйелден мемлекет кірісіне заңсыз алынған табыс ретінде 16 432 000 теңге өндірілді. Үкім заңды күшіне енген жоқ.