Қытайлық CoolFly стартапы тік тұрып басқарылатын ерекше ұшу аппараты Urban-ды таныстырды. Бұл — әзірлеушілер «әуе скейтборды» деп атайтын бір орынды электрлік дрон. Global Times мәліметінше, жаңа құрылғыны басқаруды шамамен 10 минутта меңгеруге болады, деп хабарлайды infohub.kz.
Urban әдеттегі ұшақтарға ұқсамайды: оның қанаттары да, кабинасы да жоқ. Оның орнына аппарат диаметрі шамамен 3,5 метр дөңгелек платформамен жабдықталған, оның ішінде тормен қорғалған төрт желдеткіш жасырылған. Платформаның ортасында пилотқа арналған орын бар.
Құрылғы бойы 1,9 метрге дейін, салмағы 90 келіге дейінгі адамға есептелген. Ұшу үшін платформаға тұрып, ұшу түймесін басу жеткілікті, ал бағыт басқару тұтқасы арқылы беріледі. Компания деректері бойынша, Urban сағатына 70 шақырымға дейін жылдамдыққа жете алады және әуеде шамамен 11 минут бола алады. Аппараттың құны шамамен 6,3 миллион теңгеден басталады.
Дронның басты ерекшелігі — басқару жүйесі. Пилот үнемі дене қалпын өзгерткендіктен, ауырлық центрі де өзгереді. Аппарат тепе-теңдігін жоғалтпауы үшін датчиктер пилоттың қалпын бақылап, желдеткіштердің тарту күшін автоматты түрде түзетеді. CoolFly мұның гироскутер принципімен жұмыс істейтінін, сондықтан пилотқа ұзақ уақыт оқудың қажеті жоқ — аппараттың қозғалысына үйрену жеткілікті екенін түсіндіреді.
Әзірлеушілер қауіпсіздікке де көңіл бөлген. Urban резервтік басқару жүйесімен, парашютпен, қауіпсіздік жастықтарымен және желдеткіштердің айналасындағы қорғаныс элементтерімен жабдықталған. Лидар (жарық импульстары арқылы объектілерге дейінгі қашықтықты өлшейтін технология) мен камералар ағаштар мен электр желілері сияқты кедергілерді анықтауға көмектеседі.
Компания Urban-ды экстремалды жағдайда сынақтан өткізген: 2026 жылдың ақпанында Харбиндегі іс-шаралар кезінде екі аппарат әртістерді әуеге көтерген. Ұшулар шамамен -30 градус температурада және қатты қар жауған кезде өткен.
Қазір CoolFly дилерлермен келісім жасап, Қытайдағы туристік алаңдармен және ұшу лагерлерімен ынтымақтасып жатыр. Шетелде Urban-ды жеке ұшу аппараты ретінде сату жоспарлануда.