Қызылорда облысында мал шаруашылығы саласындағы инвестициялық жобаға бөлінген бюджет қаражатын жымқыру жолы анықталды — ондаған миллион теңге бақылаудағы шоттарға аударылып, қолма-қол ақшаға айналдырылған, деп хабарлайды infohub.kz сайты.
Қаржылық мониторинг агенттігінің ресми Telegram-арнасында мәлім болғандай, Агенттіктің Қызылорда облысы бойынша департаменті мал шаруашылығы саласындағы инвестициялық жобаны жүзеге асыруға бөлінген қаражаттың жымқырылғанын анықтады.
2021 жылы «Байқоңыр» ӘКК» АҚ қатысуымен бірлескен кәсіпорын — «Сыздық Ата» ЖШС құрылған. Жобаның жалпы құны 311 млн теңгені құрады. Оның мақсаты — етті мал шаруашылығын дамыту және Жаңақорған ауданының тұрғындарын қолжетімді бағамен сапалы ет өнімімен қамтамасыз ету.
Жоба аясында корпорация ЖШС-нің жарғылық капиталына 151,5 млн теңге салды. Қаражат 1 600 бас қой, 130 бас ірі қара мал және ет қаптауға арналған жабдық сатып алуға арналған болатын.
«Тергеу деректеріне сәйкес, мал сатып алынған соң ЖШС басшысы қаражаттың бір бөлігін шығару схемасын ұйымдастырған. Барлығы 60 млн теңге күдіктіге бағынышты «Нұрай» ЖК және «Абылайхан» ЖК шоттарына заңсыз аударылып, қолма-қол ақшаға айналдырылған», — деді ведомствода.
Күдікті қамауға алынды. Соттың санкциясымен оған тиесілі екі автокөлікке тұтқын салынды. Қылмыстық іс сотқа жіберілді.