Британдық Revolut қаржы сервисі бет-әлпетті тану технологиясымен сатып алуларды төлеудің пилоттық жобасын бастады: ақша аудару үшін сатып алушыға жай ғана күлімсіреу жеткілікті, деп хабарлайды infohub.kz сайты.
«Pay with Smile» деп аталатын жаңа функция қарапайым дүкендерде сатып алуды бір-ақ рет басу арқылы жасауға мүмкіндік береді. Үдеріс смартфонды құлыптан шығаруға ұқсайды: терминал камерасы бетті сканерлеп, оны пайдаланушы банкте тіркелу кезінде берген биометриялық деректермен салыстырады. Алаяқтардан қорғау үшін барлық деректер шифрланады, ал дүкендер клиенттердің жеке ақпаратына қол жеткізе алмайды.
Әзірлеушілер қызметтің толығымен ерікті екенін атап өтті. Функция өздігінен қосылмайды — оны қолданба параметрлерінде өзіңіз қосуыңыз керек, ал келісімді кез келген уақытта жоюға болады. Сатушыларды тарту үшін сервис осындай төлемдерді өңдеу комиссиясын уақытша алып тастады, бұл шағын мекемелерге шығынды азайтуға көмектесуі тиіс.
Жүйені сынақтан өткізу Лондонның бірнеше танымал кофеханасында басталып кетті. Компания төлемнің жаңа тәсілі кассалардың жұмысын жеңілдетіп, сатып алушыларды пластик карталарды немесе телефонды шығару қажеттілігінен құтқарады деп үміттенеді. Жақын арада әзірлеушілер терминалдар желісін кеңейтіп, жүйені басқа сауда нүктелерінде іске қосуды жоспарлап отыр.