Қазақстандық велошабандозы Рината Сұлтанова Жапонияда өткен Азиада-2026 ойындарының топтық тасжол жарысында сегізінші орынға тұрақтады. Ол қашықтықты 2 сағат 52 минут 41 секундта жүріп өтіп, жеңімпаздан 2 минут 36 секундқа қалып қойды, деп хабарлайды infohub.kz сайты.
Қазақстанның тағы екі өкілі алғашқы ондыққа кіре алмады. Елизавета Склярова 2:55:52 нәтижесімен 15-орынға тұрақтап, көшбасшыдан 5 минут 47 секундқа артта қалды. Виолета Казакова болса 23-орынды иеленді — 2:58:00 (+7:55).
Алтын медальді қытайлық Ли Го жеңіп алды, ол қашықтықты 2:50:05 уақытта бағындырды. Ауғанстандық Фариба Хашими де дәл осындай уақыт көрсетіп, екінші орынға шықты. Қола Гонконг өкілі Леунг Вин Ииге бұйырды — 2:50:46.
Азия ойындары-2026. 22 қыркүйек. Велоспорт. Топтық тасжол жарысы. Әйелдер. 1. Ли Го (Қытай) — 2:50:05. 2. Фариба Хашими (Ауғанстан) — 2:50:05. 3. Леунг Вин Ии (Гонконг) — 2:50:46. 8. Рината Сұлтанова (Қазақстан) — 2:52:41. 15. Елизавета Склярова (Қазақстан) — 2:55:52. 23. Виолета Казакова (Қазақстан) — 2:58:00.
Сұлтанова үшін бұл ағымдағы Азиададағы екінші жарысы еді. 20 қыркүйекте қазақстандық шабандоз жекелей бөлек старттық жарыста жеңіске жетіп, Қазақстан құрамасына Ойындардағы алғашқы алтынын сыйлады.
Ойындардың ресми ашылуы 19 қыркүйекте өтті. 45 елдің спортшылары қатысатын кешенді жарыстарда 460 медаль жиынтығы сарапқа салынады: 217-сі — ерлер арасында, 204-і — әйелдер арасында, 39-ы — аралас разрядтарда. Азиада-2026-да Қазақстан құрамасының намысын 35 спорт түрінен 558 спортшы қорғайды.
Ойындардың бірінші күні қазақстандықтар төрт алтын медаль жеңіп алды. Ойындар чемпиондары атанғандар: велошабандоздар Рината Сұлтанова мен Алексей Луценко, сондай-ақ каратэшілер Жоламан Бигабыл мен Софья Берульцева. Екінші күннен кейін Қазақстан бейресми командалық есепте төртінші орында тұрды.