Қазақстанда робот-көліктерді енгізу бойынша пилоттық жобаның қағидалары бекітілді. Инновациялық көліктерді сынақтан өткізу үш қалада жүргізіледі, деп хабарлайды infohub.kz сайты.
Жасанды интеллект және цифрлық даму, көлік және ішкі істер министрлерінің бірлескен бұйрығы 4 тамызда қол қойылды. Құжат елде робот-көліктерді енгізу тәртібін айқындайды және оларды практикалық қолданудың құқықтық негізін қалыптастырады.
Жасанды интеллект және цифрлық даму министрлігінде түсіндіргендей, қағидалар пилоттық жобаға қатысушыларға, көлік құралдарына, оларды пайдалануға рұқсат беру шарттарына, сондай-ақ мемлекеттік бақылау және қауіпсіздікті қамтамасыз ету тетіктеріне талаптар белгілейді.
Пилоттық жоба Астана, Алматы және Қосшы аумақтарында үш жыл ішінде жүзеге асырылады. Автономды көліктерді сынау мамандандырылған полигондарда да, уәкілетті мемлекеттік органдармен келісілген жалпы пайдаланымдағы жолдардың белгілі бір бағыттарында да жүргізілуі жоспарлануда.
Жаңа қағидалардың басты ерекшеліктерінің бірі — әртүрлі деңгейдегі автоматтандырылған көлік құралдарына қойылатын талаптардың саралануы. Шартты автоматтандырылған көліктерде кез келген уақытта басқаруды қолға алуға дайын адамның болуы міндетті. Жоғары автоматтандырылған көліктерде жүргізушісіз пайдалануға рұқсат етіледі, бірақ қашықтан оператордың сүйемелдеуі ұйымдастырылуы тиіс.
Құжат сонымен қатар пайдалану қауіпсіздігіне қойылатын міндетті талаптарды белгілейді. Автономды көлік құралдары деректерді тіркеу жүйелерімен, бейнебақылаумен, автоматтандырылған басқару жүйесін авариялық өшіру құралдарымен, «Автономды басқару» деген арнайы белгімен, сондай-ақ бағдарламалық қамтамасыз етуге сыртқы араласудан қорғау тетіктерімен жабдықталуы тиіс.
Жолаушыларды тасымалдау, құқық қорғау органдарымен өзара іс-қимыл және жол-көлік оқиғалары кезіндегі әрекеттер мәселелеріне ерекше назар аударылған. Қағидалар такси қызметін көрсету және тұрақты емес жолаушылар тасымалы кезінде автономды көліктерді пайдалану тәртібін айқындайды, сондай-ақ пилоттық жоба субъектілерінің жауапкершілігін сақтандыру талаптарын белгілейді.