Қазіргі робот-шаңсорғыштар пәтер тазалаумен ғана шектелмейді: олар тұрғын үйдің картасын, әңгіме жазбаларын және интерьер фотоларын жинап, бұл мәліметтерді бөгде серверлерге жібереді. Бұл туралы Engadget басылымы жазып, infohub.kz сайты хабарлады.
Ақылды шаңсорғыштар бөлмелерде бағдарлау үшін микрофонмен, сенсормен және камерамен жабдықталады. Алайда дәл осы құрылғылар үйде болып жатқан жағдай туралы егжей-тегжейлі ақпаратты тіркей алады. Моделіне қарай робот тазалау тарихын, бөлмелердің жоспарын, үй-жай атауларын, еден жабындысының түрлерін, тіпті жергілікті Wi-Fi желісі туралы деректерді де сақтай алады.
Негізгі мәселе — құрылғылардың өндірушінің бұлттық сервистерімен міндетті түрде байланысуында. Пайдаланушы шаңсорғышқа қашықтан қосылғанда, деректер сыртқы серверлер арқылы өтеді. Бұл қауіпсіздік жүйесіндегі ықтимал ақаулар салдарынан ақпараттың тарап кету қаупін тудырады. Мысал ретінде сарапшылар қолжетімділік құқығындағы қателіктен пайдаланушының әлем бойынша 7000 бөтен шаңсорғышты байқаусызда басқарып алған жағдайын келтіреді.
Жеке деректерді қорғау үшін мамандар сатып алу алдында құпиялылық саясатын зерделеуді және ақпаратты жергілікті өңдейтін модельдерді таңдауды ұсынады. Құрылғысын сатып алып қойған иелеріне прошивканы жүйелі түрде жаңартып отыруға, күрделі құпиясөздерді пайдалануға, екі факторлы аутентификацияны қосуға және қашықтан бейнеқарау сияқты функцияларды өшіруге кеңес береді.