Бейсенбі күні Нидерландтың Роттердам портында болған жарылыс салдарынан кемінде бір адам қаза тауып, тағы бірнеше адам жараланды. Бұл туралы қалалық полиция мәлімдеді, деп хабарлайды infohub.kz.
Полицияның мәліметінше, Еуропадағы ең ірі порттағы жарылыс бейсенбі күні таңғы уақытта болған. Оқиға орнында тергеу жұмыстары жүргізілуде, жарылыстың себебі анықталуда.
Жарылыс порттың үлкен аумағындағы өнеркәсіптік аймақта орналасқан Gunvor Energy компаниясының мұнай өңдеу зауыты мен отын терминалында болды. Нидерландтың NOS телеарнасының хабарлауынша, сол жерде жөндеу бригадасы құбырлардың бір бөлігінде жұмыс істеп жатқан.
Роттердамның жедел қызметтері портта ірі электр қуатының ақауы болғанын хабарлап, трансформатордың белгісіз себептермен өртенгенін мәлімдеді. Бірнеше компания жұмысын тоқтатып, қызметкерлерді эвакуациялады.
Бірнеше сағаттан кейін порттың өнеркәсіптік аймағындағы компанияларға электр қуаты біртіндеп қалпына келтірілді. Онда бірнеше мұнай және газ компаниялары орналасқан, өрт сөндірушілер кезекшілікте тұр. Электр қуатының ақауы мен жарылыстың арасында байланыс бар-жоғы әзірге белгісіз.