АҚШ Мемлекеттік хатшысы Марко Рубио 23 шілдеде Манилада өткен АСЕАН саммиті аясында ресейлік әріптесі Сергей Лавровпен кездесті. Кездесуден кейін Рубио АҚШ Украинадағы соғысты аяқтауға көмектесуге дайын екенін хабарлады, деп жазады infohub.kz.
Рубионың айтуынша, АҚШ президенті Дональд Трамп мүмкіндік туса, «мағынасыз соғысты» тоқтатуға жәрдемдесуге дайын. Бұл хабарды Вашингтон Мәскеуге жеткізген, алайда Рубио кездесуде Ресейдің ұстанымын сипаттаудан бас тартты.
Рубио кездесуді «жақсы әрі шынайы әңгіме» деп бағалады, бірақ нақты не талқыланғанын айтпады. «Америка Құрама Штаттары, президент нақты айтқандай, мағынасыз соғысты аяқтауда сындарлы рөл атқаруға дайын. Біз бұған әзірміз», — деді ол.
Өз кезегінде Лавров «Ресейдің қақтығысты саяси-дипломатиялық жолмен реттеуге дайын екенін» растады. Ресей Сыртқы істер министрлігінің мәлімдемесінде Лавровтың Рубиоға Мәскеу президенттер Трамп пен Путиннің 2025 жылы тамызда Аляскада өткен кездесуінде ұсынған бастамаларға берік екенін жеткізгені айтылған.
Рубио соғыстың ауыр зардаптарын, бейбіт тұрғындардың қазасы мен Киевке жасалған ресейлік шабуылдарды еске салды. «Бұл қанды соғыс. Екі тарап та соғысты аяқтағысы келеді, бірақ басты мәселе — екі жаққа да лайықты шешім табу. Біз тырыстық және әлі де ортақ жол іздеп жатырмыз», — деді ол.