Әлемдік рейтингте екінші орында тұрған қазақстандық теннисші Елена Рыбакина WTA көшбасшысы Арина Соболенконы қуып жету мүмкіндігі туралы пікір білдірді. Торонтодағы WTA-1000 сериясындағы беделді турнирдің ширек финалына шыққаннан кейін оның айырмашылықты төрт ұпайға дейін қысқартуға мүмкіндігі пайда болды... деп хабарлайды infohub.kz.
«Мен бұл туралы ойламауға тырысамын, өйткені маған әлі көп матч ұту керек», — деп келтіреді Рыбакинаның сөзін Punto de Break.
Спортшы қазір ол үшін өз ойынының сапасы мен шөп кортындағы сәтсіз кезеңнен кейінгі прогресс маңыздырақ екенін атап өтті. «Мен үшін қазір ең бастысы — менің дамуды жалғастырып жатқанымды көру», — деді ол.
Айырмашылықты төрт ұпайға дейін қысқарту үшін Рыбакина турнирде жеңіске жетуі керек. Соболенко Торонтодағы өнерін төртінші раундта ресейлік Екатерина Александровадан (19) 6:7 (3:7), 6:4, 4:6 есебімен ұтылып аяқтады. Алайда беларусьтік теннисшінің 1/8 финалға шығуы оған жарыс аяқталғаннан кейін Рыбакинаның нәтижесіне қарамастан бірінші орынды сақтап қалуына кепілдік берді.
Турнир басталар алдында Соболенконың 8 550 рейтингтік ұпайы болса, Рыбакинада — 8 056. Қазақстандық теннисші өткен жылғы канадалық «мыңдықтың» жартылай финалы үшін 390 ұпайды қорғап жатыр.
Кеше Рыбакина Торонтодағы турнирдің ширек финалына шығып, ресейлік Людмила Самсонованы (47) 6:4, 4:6, 6:4 есебімен жеңді. Шешуші партияда қазақстандық теннисші 0:3 есебімен ұтылып, екі брейк беріп қойған еді, алайда матч барысын өз пайдасына шере алды. Матч 2 сағат 49 минутқа созылды.
Ширек финалда әлемнің екінші ракеткасы төрт дүркін Үлкен шлем турнирлерінің жеңімпазы Наоми Осакамен (13) кездеседі. Жапониялық теннисші төртінші раундта канадалық Лейла Фернандесты (34) 6:4, 6:4 есебімен жеңді. Рыбакина мен Осака үшін бұл алғашқы ресми кездесу болады.