Дүниежүзілік тамақтану рационын түбегейлі өзгерту мал шаруашылығы көлемін айтарлықтай азайтып, жерді босатып, жер пайдалануға байланысты CO₂ шығарындыларын 2050 жылға қарай 85%-ға төмендетуі мүмкін, деп хабарлайды infohub.kz сайты.
Лондон гигиена және тропикалық медицина мектебінің ғалымдары Корнелл университетімен бірлесіп, Nature журналында әлемдік азық-түлік жүйесін модельдеу нәтижелерін жариялады. Зерттеу EAT-Lancet 2025 жылғы комиссиясының ұсынымдарына сүйенеді.
Есептеулерге сәйкес, жер шары халқының салауатты тамақтану рационына көшуі 2050 жылға қарай ауыл шаруашылығы жерлерін пайдалануды 6%-ға азайтады. Сонымен қатар мал шаруашылығы өнімдерінің құны 42%-ға (630 млрд доллар) төмендейді. Күйіс қайыратын малдардың (ірі қара, қой, ешкі) саны 400 млн басқа азаюы мүмкін.
Сонымен бірге көкөніс, жеміс, жаңғақ және бұршақ дақылдарының өндіріс көлемі 57%-ға (890 млрд доллар) артады. Зерттеудің жетекші авторы Мэтт Гибсон мұндай өзгерістер үкіметтерден батыл қадамдар мен аграрлық секторды қайта құруға дайын болуды талап ететінін атап өтті.
Өңірлік талдау реформаның әртүрлі әсерін көрсетті: АҚШ-та ауыл шаруашылығы өндірісінің құны 21%-ға, Еуропада 35%-ға төмендейді, ал Үндістанда бұл көрсеткіш өсімдік шаруашылығының дамуы есебінен 46%-ға өседі.