Сәтбаевта 60-қа жуық отбасы апатты деп танылған көпқабатты үйден екі жылдан бері көше алмай жүр. Тұрғындар қабырғаны көлденең жарып өткен жарықтарға, қисайған есіктерге және ғимараттың шөгуіне шағымданып отыр. Қыстың жақындауы оларды әсіресе алаңдатып отыр, деп хабарлайды infohub.kz сайты.
Үй 1974 жылы салынған. Тұрғындардың айтуынша, жарықтар үлкейіп, терезе мен есіктер деформацияланып барады. Адамдар үйдің құлауынан қорқып, ғимараттың алдағы қысты қалай өткізетінін білмей отыр.
«Есіктер жабылмайды, жабылуы үшін қайрауға, кесуге, аралауға тура келеді, бәрі қисайған. Қабырғалар гуілдейді, мына жарықтар көлденең жарып өтіп, ашылып барады. Міне, жел естіледі. Жазда немерем келіп: әже, мен сенде отыра алмаймын, үй құлап бара жатқан сияқты, деді. Бізде қабырғалар қисайған, вазаны үстелге қоя алмаймын, құлап кетеді», — деді Сәтбаев тұрғыны Людмила Кривоченко.
Тұрғындар апаттылық туралы қорытынды алғаннан кейін де көшу мәселесі шешілмегенін айтады.
«Ұйықтар алдында түнде үй құлап, біз тірі оянамыз ба деп дұға етеміз. Үйдің апаттылығы туралы сараптама қорытындысы бізге тек 2024 жылы берілді. Бірақ осы екі жылда бізді көшірмеді. Әкімдер ауысады, ал біз өз қайғымызбен қаламыз», — деді Сәтбаев тұрғыны Рашида Тукаева.
Адамдарды әсіресе суықтың жақындауы алаңдатады. Олардың айтуынша, бүлінген қабырғалардан жел кіреді, ал қыста пәтерлерде тұру мүмкін болмай қалады. Кейбір отбасылар басқа баспана жалдауға мәжбүр болған.
«Екі жылдан бері пәтер жалдап тұрамыз. Бұл үйде тұру мүлдем мүмкін емес, әсіресе қыста. Барлық қабырғалар жарылып жатыр. №150 үй ортасынан, үшінші және екінші подъездер арасында шөгіп барады. Әкімдіктен көмек сұраймыз: не баспана берсін, не ақша төлесін», — деді Сәтбаев тұрғыны Сатбай Сералин.
Тұрғындардың шағымынан кейін әкімдік өкілдері ғимаратты тексерді. Оның жағдайын арнайы комиссия бағалауы тиіс, алайда шенеуніктер түсініктеме берген сәтте комиссия әлі құрылмаған болатын.
«Дәл осы үй бойынша қазіргі таңда комиссия әлі құрылған жоқ. Енді құрылады, оның шешімі қосымша ұсынылады. Комиссияны осы аптаның соңына дейін, бүгін-ертең құруды жоспарлап отырмыз. Келесі аптаның басында нәтижесін хабарлаймыз», — деді Сәтбаев қаласының тұрғын үй инспекциясы бөлімі секторының меңгерушісі Гүлмира Нұрманова.
Барлығы қалада 28 апатты және 223 ескірген үй бар. №150 үйдің тұрғындары комиссия шешімін күтіп отыр. Олардың айтуынша, көптеген отбасыға өз бетінше пәтер сатып алу немесе басқа баспана жалдау қаржылық тұрғыдан қиын.