2025 жылдың қорытындысы бойынша SCAT әуекомпаниясының таза пайдасы 39,3 млрд теңгені құрады, ал оның басты бәсекелесі Air Astana небәрі 7 млрд теңге тапқан. Бұған Finmentor.kz арнасының авторы Арман Батаев назар аударды. Айта кету керек, SCAT активтері мен кірісі бойынша елдегі жетекші әуекомпаниядан екі еседен астам артта қалып отыр, деп хабарлайды infohub.kz сайты.
Экономист Батаев Қазақстандағы екі ірі әуе тасымалдаушысының өткен жылғы қаржылық көрсеткіштерін салыстырды. Кіріс бойынша SCAT Air Astana-дан 2,4 есе артта қалғанына қарамастан (322,5 млрд теңгеге қарсы 759 млрд теңге), пайда бойынша Шымкенттік әуекомпания өзінің басты бәсекелесін басып озды.
SCAT-тың таза пайдасы өткен жылмен салыстырғанда 8%-ға өсіп, 39,3 млрд теңгеге жетті. Ал Air Astana 7 млрд теңге тапқан, бұл бір жыл бұрынғыдан 72,5%-ға аз.
Осылайша, SCAT кірісі аз болғанына қарамастан, 5,6 есе көп табыс тапты. Жалпы соманың 311,7 млрд теңгесін SCAT жолаушылар тасымалынан, 4,4 млрд теңгені рейстерге берілетін субсидиялардан, тағы 4 млрд теңгені жүк тасымалынан алды.
SCAT-тың қызмет көрсету құны 270,6 млрд теңгені, әкімшілік шығындары 5,6 млрд теңгені, сату бойынша шығындары 16,6 млрд теңгені құрады. Шығындардың негізгі баптары отын (84 млрд теңге), әуежай қызметтері (46 млрд теңге), материалдар мен қосалқы бөлшектер (27 млрд теңге) және жалақы (20 млрд теңге) болды.
Салыстыру үшін, Air Astana отынға 173 млрд теңге жұмсады — бұл SCAT-тан екі еседен астам, персонал мен экипажға — 136 млрд теңге, техникалық қызмет көрсетуге — 76 млрд теңге және әуежай қызметтеріне — 73,6 млрд теңге.
Батаев сонымен қатар SCAT-тың 2025 жылғы нәтижесіне бағамдық айырмашылықтан түскен 12,3 млрд теңге көлеміндегі пайда айтарлықтай әсер еткенін атап өтті. Ал Air Astana, керісінше, бағамдық айырмашылықтан 4 млрд теңге шығынға ұшырады.
Екі компанияда да лизингтік келісімшарттар мен флоттың кеңеюіне байланысты қарыз жүктемесі өсті. Мәселен, Air Astana-ның лизингтік міндеттемелері 528 млрд теңгені құрады, ал SCAT-тың қарыздары мен лизингтік міндеттемелері 238,1 млрд теңгеге дейін өсті. SCAT-та 2025 жылы жалға алынған ұшақтар саны сегізден тоғызға дейін артты.
Арман Батаев ақша ағындарының ауқымы бойынша SCAT Air Astana-дан төрт еседен астам артта екенін атап өтті — 30,4 млрд теңгеге қарсы 128 млрд теңге. Активтер бойынша Air Astana (1 трлн теңге) SCAT-тан 2,5 есе асып түседі, ал SCAT-та бұл көрсеткіш 411,9 млрд теңгені құрайды.
Дегенмен, SCAT 2025 жылды айтарлықтай жоғары таза пайдамен және рентабельділікпен аяқтады.
Бұған дейін Air Astana әуекомпаниясы басқарма мүшелерінің сыйақысы 2025 жылы 691 млн теңгені құрағаны — бір жыл бұрынғыдан 31,6%-ға көп екендігі хабарланған болатын. Бұл ретте компания басқармасына бір адам — оның бұрынғы басшысы Питер Фостер кірген.