Бұрынғы Семей сынақ полигонының аумағында мемлекеттік қордағы пайдалы қазбалардың бес кен орны анықталды, деп хабарлайды infohub.kz.
Өнеркәсіп және құрылыс министрлігінің «Курсивке» берген жауабында айтылғандай, олардың қатарында Есымжал резервтік марганец кен орны бар, оның құрамына Есымжал, Дәулетпай және Оңтүстік Қостарақ учаскелері кіреді. Оның жалпы баланстық қоры 999 мың тонна марганец рудасын құрайды.
Сонымен қатар, полигон аумағында баланстан тыс қоры 4 357 тонна болатын Қаражал резервтік бериллий кен орны орналасқан.
Сондай-ақ, мұнда Шорское мыс-молибден кен орны (Шығыс учаскесі) бар, ол қатты пайдалы қазбаларды өндіру үшін басымдық тәртіппен «Шығыс Молибден» ЖШС-не (иесі – Махмұд Қасымбеков, тұңғыш президент Нұрсұлтан Назарбаев кеңсесінің бұрынғы басшысы) берілген.
Бұдан басқа, бұрынғы полигон аумағында Болдыкөл және Байболат алтын кен орындары орналасқан. Болдыкөл кен орнына жер қойнауын пайдалану құқығын аукцион жеңімпазы «BKO SMART» ЖШС (иесі – Бақытбек Набиев), ал Байболат кен орнына «ZHAMBAS-PV» ЖШС (иелері – Айбек пен Қуат Оразимандар, Оразиман отбасына британдық Caspian Sunrise мұнай өндіру және барлау компаниясының үлесі тиесілі. Оның негізгі қызығушылығы Каспий маңы бассейніндегі BNG келісімшарттық учаскесіне байланысты) ие болды.
Сонымен қатар, министрлік қазіргі уақытта бұрынғы полигон аумағында тау-кен байыту комбинаттарын, өңдеу кәсіпорындарын немесе өзге де өнеркәсіптік инфрақұрылымды салу жобаларының іске асырылуы туралы ақпаратқа ие емес екенін хабарлады. Сондай-ақ, ведомствода осы кен орындарын игеруден түсетін инвестициялардың алдын ала көлемі мен күтілетін экономикалық тиімділік туралы деректер жоқ.
Еске салайық, Семей ядролық қауіпсіздік аймағы – бұрынғы Семей сынақ ядролық полигонында ядролық қару сынақтары салдарынан нормативтен тыс радиоактивті ластануға ұшыраған Қазақстан аумағының шектеулі бөлігі, онда заңнамада көзделген арнайы құқықтық режим қолданылады.
Бұған дейін «Курсив» Altyn Group Qazaqstan компаниясы бұрынғы Семей сынақ полигонының аумағында алтын өндіруді жоспарлап отырғанын жазған болатын. Компанияның тапсырысы бойынша жүргізілген зерттеу 73 тоннадан астам алтын қоры бар Үлкен Қарашоқы кен орны адамдарға радиациялық қауіп төндірмейтінін көрсетті.