Абай облысы бойынша қылмыстық істер жөніндегі мамандандырылған ауданаралық сот Семейде қоқыс жәшігіне тасталған нәрестенің өліміне қатысты үкім шығарды. Сәбиді суыққа тастап кеткен ер адам өмір бойына бас бостандығынан айырылды, ал нәрестенің анасы амнистия бойынша жазадан босатылды, деп хабарлайды infohub.kz сайты.
2000 жылы туған ер адам Қазақстан Қылмыстық кодексінің 99-бабының 3-бөлігі бойынша кәмелетке толмаған баланы өлтіруге кінәлі деп танылды. Ол өмір бойына бас бостандығынан айыру жазасын ерекше режимдегі мекемеде өтейді. Сонымен қатар ол полиция аға лейтенанты шенінен айырылды.
Баланың 2005 жылы туған анасы Қылмыстық кодекстің 100-бабы — «Ананың жаңа туған нәрестені өлтіруі» бойынша сотталды. Оған екі жыл бас бостандығынан айыру жазасы тағайындалды, алайда жаңа Конституцияның қабылдануына байланысты амнистия туралы заң бойынша жазадан босатылды. Әйел полиция кіші сержанты шенінен де айырылды.
Іс материалдарына сәйкес, қыз үйде жасырын түрде босанған, содан кейін жігіті нәрестені көлікке салып апарып, қоқыс жәшігіне тастаған. Екі сотталушы да кінәсін мойындамады. Сот SMS-хабарламаларды, WhatsApp жазысқан хаттарды, куәлардың жауаптарын және сараптама қорытындыларын зерттеді.
«Сотта қаралған сараптама деректеріне сәйкес, бала туған кезде тірі болған. Кейін белгілі бір уақыттан соң ол суықтың әсерінен қайтыс болды», — деді судья үкімді жариялау кезінде.
Бұған дейін нәрестенің денесі Семейде 3 ақпанда табылғаны хабарланған. Ол сүлгіге оралған болатын. Сол кезде 20 жастағы ана үйде босанғанын және баланың өмір белгілерінсіз дүниеге келгенін айтқан, алайда сараптама нәрестенің суықтан қайтыс болғанын анықтады.
Осыған ұқсас оқиғалар биыл Жамбыл облысында және Ақтөбеде болды. Қыркүйекте жаңа туған нәресте Гвардиялық гарнизон аумағындағы қоқыс жәшігінен табылса, мамырда Ақтөбеде сәби пакет ішінде ағаш астынан табылды. Екі бала да аман қалды.